Suenter l'augment dals custs per la nova pendiculara, ha il parlament da Cuira la gievgia, ils 13 da november, puspè tractà la dumonda: approvar il credit pli aut u betg?
La nova pendiculara è ina schanza per Cuira ed in project persistent.
La debatta n’ha betg be dividida per lung il cunfins da partida tradiziunals mabain era tras las partidas. Il nov project saja memia char e memia cumplitgà, Brambrüesch tutgia dentant tar la DNA da la citad.
In tema che divida l'opiniun ed in votum strategic
Davart las schanzas e las consequenzas èsi vegnì debattà. Ils Verd-liberals veglian dir Gea a moda tremblanta, socialdemocratas vuschian per part Na cun cor grev e tar la PPS na sajan ins betg encunter Brambrüesch, dentant encunter la furma proponida.
Per nus èsi impurtant, ch’i dettia almain 7 vuschs tar la minoritad.
Sper quels arguments hai era dà vuschs encunter Brambrüesch or da motivs da strategia.
12 vuschs hai dà per la missiva, 8 encunter ed 1 abstenziun. Almain 7 vuschs encunter dovria per ch’ils arguments da la minoritad vegnian stampads en la missiva per il suveran.
Igl è impurtant ch’il suveran enconuscha omaduas opiniuns ed haja tut las infurmaziuns necessarias.
La fin finala èsi vegnì decidì a favur da la nova pendiculara cun la nova dumonda per in credit da total 40,6 milliuns francs, na l’ultim per dar explicit al suveran l'ultim pled en chaussa. La votaziun è previsa il mars 2026.
Ina renovaziun è necessaria
Las pendicularas Cuira Dreibündenstein BCD marschian betg mal. Quai han ditg ils responsabels da las pendicularas tar la preschentaziun dal rapport da la stagiun 2024/25. In onn da gestiun cun success, han ditg ils responsabels da las pendicularas BCD il settember 2025: Quai cun in gudogn da passa 380’000 francs.
Sch’ins guarda sin l’infrastructura, alura è surtut necessari da renovar la part sura, la segunda secziun da la pendiculara. Questa saja a la fin da sia durada da vita ed igl è cumplitgà da survegnir tocs per reparar. La segirezza da questa part saja adina tema en il cussegl d’administraziun, manegia il commember Peter Engler.
Custs èn creschids ad in crescher
In auter tema era la nova pendiculara che duai vegnir bajegiada. Dal 2019 ha il pievel da Cuira ditg Gea ad in credit da 24,4 milliuns francs cun in spazi da 25 % – pia avess la pendiculara pudì custar maximalmain 30,5 milliuns francs. Cun l'ir dals onns è era sa midà il project, surtut la careschia ha auzà il pretsch.
Ussa quintan ins cun custs da 40,6 milliuns francs. Quel na pertutga betg mo la pendiculara, mabain tschintg milliuns èn era vegnids tiers per l'areal enturn la staziun da val. Tuttina è il pretsch pli aut che quai che la populaziun aveva approvà il 2019 - numnadamain 24,4 milliuns francs - pia 66% dapli.
Process politic actual
Cun quest augment da 30 milliuns sin 35 milliuns – respectiv 40 milliuns per tut – ha il parlament da Cuira pretendì ina nova votaziun. La suprastanza da Cuira aveva elavurà il project e la missiva ch'il parlament da Cuira ha debattà cuntravers. La finala ha il parlament però approvà la missiva e la predeliberà per mauns da la votaziun dal pievel.
Cunvegna cun citad
Sch'i dat in Gea, alura sto la BCD anc vegnir ensemen cun raps, per che la citad da Cuira sustegnia il project. Els han numnadamain ina cunvegna, che las pendicularas ston avair reservas da dus milliuns francs, per che la citad sustegnia. Peter Engler dal cussegl da fundaziun da las pendicularas BCD di, ch’els hajan ensemen ina part, dentant betg anc tut. Da tgi e co, quai n'ha il commember dal cussegl administrativ betg vulì dir.
Urari
Proxima primavaira vegn il project davant il pievel. Suenter sto la BCD anc ir per tut ils permiss ed alura pudessan las lavurs da construcziun cumenzar la primavaira 2027. E la fin 2028 - u cumenzament 2029 - pudess alura l’emprima gondla da la nova pendiculara ir si Brambrüesch. Fin là dovri dentant anc in Gea e raps.