Il nov rapport d'in expert dal chantun Vad saja vegnì surdà avant intgins dis a las differentas partidas. Quellas han uss temp fin la fin dal mais da prender posiziun davart il rapport e da far dumondas. Il nov rapport era necessari, perquai ch'ils rapports existents èn vegnids scrits da persunas cumpigliadas.
Ils inquisiturs vegnan, grazia al rapport, ad avair dapli invista en ils cas. Uschia duain els decider sch'i sto vegnir fatga ina accusaziun cunter la vischnanca Bregaglia ed il chantun Grischun. Quels fissan numnadamain stads responsabels per valitar la segirezza da la muntogna.
Davart il cuntegn dal rapport n'è tenor RSI anc nagut enconuschent. Las partidas cumpigliadas han decidì da betg communitgar publicamain.
Preistorgia
Otg persunas èn mortas pervia da la crudada da crappa a Bondo l'onn 2017. Quai, era sch'igl era enconuschent avant ch'il Cengalo sa movia. L'Uffizi da guaud e privels da la natira n'ha dentant betg reagì, e las raschuns per quai n'èn betg enconuschentas. Il cas vegn pia intercurì per chattar or, sch'insatgi po vegnir declerà culpant da las persunas mortas.
In'emprima expertisa ha mussà che nagin saja responsabel per la mort da las persunas. Il Tribunal federal aveva dentant decidì che la procura publica sto anc ina giada intercurir il cas. Els hajan sa basà sin in rapport da Uffizi da guaud e privels da la natira – ch'avess gì d'avertir dal privel.
In nov rapport che la procura publica aveva scrit, na valeva tenor la Dretgira chantunala puspè betg. Puspè haja quel sa basà sin in rapport d'in expert pertutgà. Quai è vegnì enconuschent il favrer da quest onn.
