La cuntraproposta na cuntenta las iniziantas ed ils iniziants. Perquai ha il comité da l'iniziativa decidì da laschar decider las votantas ed ils votants davart l'iniziativa dal clima da la citad. Quai scriva ella en ina communicaziun a las medias. Ils 3 da mars 2024 saja il termin probabel per la votaziun.
La cuntraproposta na saja «betg lianta», e na prescrivia betg finamiras concretas per surfatschas. L'iniziativa vul numnadamain transfurmar la surfatscha da la citad e stgaffir dapli spazi verd.
Il comité sa mussa er trumpà dal messadi dal cussegl da la citad. Ils custs per la realisaziun sajan «cumplettamain exagerads». Els cuntegnian er ils custs per far vias cun craps da sulada, quai n'haja da far nagut cun lur iniziativa. Ed il cussegl haja er quintà vitiers las vias d'alps ed uschia augmentà ils custs supponids da l'iniziativa.
