La nova basa sper l'access d'autostrada Cuira Sid è vegnida inaugurada uffizialmain. Quai suenter in temp da construcziun da radund in onn e mez. La polizia chantunala è gia dapi l'avust en il bajetg e l'entschatta october po la populaziun dar in sguard en il bajetg ch'è vegnì construì a moda persistenta. Tranter auter hai sut tut las fanestras moduls d'energia solara.
La polizia da traffic po cuntanscher da questa basa anora las vias davent da Maiavilla fin a la Viamala, plinavant sajan ins datiers da la via vers Lai. Per motivs organisatorics e da manaschi unescha ella las basas existentas a Cuira ed a Tusaun.
La nova basa da la polizia da traffic dat suttetg a radund 50 collavuraturas e collavuraturs – sco er a differents vehichels da la polizia. Ils custs muntan a 9,8 milliuns francs.
Standards persistents ed utilisaziun flexibla
Sco la ministra da traffic, Carmelia Maissen, ha ditg envers RTR, saja la basa in edifizi exemplaric per la strategia da persistenza, decidida en il Cussegl grond en il rom dal «Green Deal». Il nov edifizi duai ademplir standards d'effizienza d'energia e persistenza.
Quest nov bajetg tracta l'aspect da la persistenza a moda e maniera fitg cumplessiva.
Il bajetg saja in da «nulla emissiuns». Uschia posseda el moduls da fotovoltaica sin la fatschada. Quella duai producir var trais giadas dapli energia che quai ch'il bajetg dovra. Er ils materials nizzegiads duain esser uschè persistents sco pussibel. Sper bler lain vegn duvrà il material da stgavament per far il betun da l'edifizi. Ils locals en la basa lubeschan in manaschi flexibel.
Las experientschas da quest project duain vegnir nizzegiadas per ulteriurs projects, tant dal chantun sco er en general en la branscha da construcziun, uschia Carmelia Maissen vinavant.
Inauguraziun uffiziala cun ina clav da tschigulatta
Ils 18-09 ha la regenza surdà uffizialmain la clav e inaugurà la nova basa per la polizia da traffic. Suenter in temp da construcziun dad in onn e mez è l'edifizi ussa avert. Ils 5 d'october avran els las portas per la publicitad per dar ad els in'egliada davos las culissas.