Las dretgiras regiunalas Alvra e Malögia survegnan dapli persunal. Quai per ch'il dumber dals cas pendents possia vegnir reducì. Sco quai che la cumissiun per giustia dal Cussegl grond communitgescha, hajan ins en il fratemp elegì duas derschadras ed in derschader extraordinari. Per mintga regiun ina plazza da 100%, limitada sin dus onns.
Per la dretgira regiunala Alvra èn vegnidas elegidas Barbara Steinbacher e Ladina Sturzenegger per mintgamai 50%. Nov derschader per la regiun Malögia daventa Peter Guyan en in pensum cumplain.
Culm da pendenzas
La raschun per il culm da pendenzas sajan numerusas decisiuns politicas e svilups en la societad, argumentescha la cumissiun. Las dretgiras regiunalas Alvra e Malögia hajan tant da far ch'ellas na pon betg pli liquidar punctualmain las proceduras giuridicas. La cumissiun ha perquai examinà la dumonda per dapli persunal e dà suatientscha a quest giavisch.
Gia l'onn passà aveva la cumissiun rinforzà la dretgira chantunala e la dretgira regiunala Plessur. Quai suenter ina decisiun dal Cussegl grond da l'onn passà.
Refurma da giustia duai gidar
La cumissiun da giustia dal Cussegl grond fa attent ch'il problem saja enconuschent e che la refurma da giustia duai gidar. La lescha revedida pussibilitescha numnadamain d'engaschar temporarmain dapli persunal sche necessari.
Questa revisiun n'è dentant anc betg en vigur – il Cussegl grond ha deliberà quella ed il november ha il pievel l'ultim pled en chapitel.