La mort n'è betg in tema simpel. Ma gist en quests muments grevs da la vita po il prender cumià d'ina persuna chara dar blera forza. Cun quest tema sensibel, ma impurtant è Petra Rothmund sa fatschentada en ses film «Cumià e cuminanza - Abschied und Gemeinschaft». Cun il Premi catolic da las medias - ch'è dotà cun 2'500 francs - ha era la Conferenza dals uvestgs svizzers onurà e dà paisa a la tematica impurtanta.
Il film documentar da Petra Rothmund sa fatschenta cun la dumonda tge impurtanza che rituals dal prender cumià en cuminanza han anc en nossa societad d'ozendi, ch'è daventada adina pli individualistica. En sia ovra mussa ella co differentas persunas surmuntan quests muments da gronda tristezza ed tge rituals che dattan forza ad els ed ellas.
Sepulturas sco part centrala da la cardientscha cristiana
A la Conferenza dals uvestgs svizzers dals 13 da matg a Berna ha l'uvestg Josef Stübi – era numnà «l'uvestg da medias» – anc punctuà ina giada en sia laudatio l'impurtanza dal film premià da Petra Rothmund. La sepultura d'ina persuna morta saja in tema central en la cradientscha cristiana. Quella stettia en connex cun la misericordia. Rituals dal prender cumià demussian tenor Josef Stübi il respect per la vita ed il corp uman. Els sajan era in simbol per la speranza da la cardientscha cristiana che «la mort n'ha betg il davos pled.»
Ina sepultura degna è ina part centrala da la cardientscha cristiana.
Il film da RTR è sa mess atras encunter las autras regiuns linguisticas. Radund 40 ovras medialas hajan empruvà ses cletg a la concurrenza per il Premi catolic da medias.
Sper il premi principal che «Cumià e cuminanza» ha gudagnà, èn duas ulteriuras ovras medialas vegnidas onuradas: Il pretsch spezial - dotà cun 1'000 francs - ha gudagnà in magazin da la Romandia ed il premi da «social media» - dotà cun 500 francs - ha gudagnà Eveline Strübi da la Svizra tudestga per sia reportascha sur Instagram davart l'impurtanza da la credientscha durant ses cumbat cun Long covid. La finamira da la premiaziun a Berna saja da suttastritgar la muntada da la lavur e creativitad schurnalistica per la baselgia e credientscha en l'entira Svizra.