Tenor lescha, sto ina surfatscha runcada en Svizra vegnir remplazzada cun emplantaziuns u mesiras da protecziun da la natira en in auter lieu. A Trimmis è ussa per l'emprima giada en il chantun Grischun vegnì realisà uschè in project da cumpensaziun – quai sin in territori da var 4,5 hectaras. En il territori da las zonas umidas dal Rain hai uschia dà in areal da protecziun da la natira ed in lai per far bogn e per pestgar. Custà ha quest project 2,5 milliuns francs. Dus da quels milliuns ha pajà il chantun ed in mez milliun è or dal fondo da las ovras electricas da la citad da Turitg.
Il nov territori da cumpensaziun creescha in reservat natiral. Uschia pon fatschentas runcar guaud en auters lieus e pajar in tschert pretsch per meter quadrat. Quai vegn lura da bun al project Rheinauen. Sco il selvicultura chantunal Urbain Maissen declera, hajan ins cun quest project pensà vid projects futurs. Ins ha en quest senn stgaffì ina surfatscha sin reserva:
Cura ch'ins vul ina lubientscha da runcada na ston ins uschia betg exnum ir a tschertgar la surfatscha da recumbensaziun, quella è qua sin reserva. Ins po en quest senn sa cumprar en en quella surfatscha.
E la dumonda persuenter saja gronda. Ina da las 4,5 hectaras saja gia reservada per dus projects che ston vegnir recumpensads en il Grischun.
Fin il 2013 è la surfatscha tranter l'autostrada ed il Rain stà in implant da glera. Enstagl dad emplenir la rusna, è vegnì creà in areal da natira. Entamez è in lai cun lieu umid per plantas ch'èn fin dus meters en l'aua. Or da la cuntrada che vesa actualmain ora plitost sco sin la glina, vegnan plantas ad emplenir il spazi.
-
Bild 1 von 3. L'implant da glera fin il 2013. Bildquelle: Chantun Grischun.
-
Bild 2 von 3. Il nov areal da protecziun da la natira. Bildquelle: Chantun Grischun.
-
Bild 3 von 3. Il lai da far bogn. Bildquelle: Chantun Grischun.
Il nov spazi da viver na duai però betg mo servir a la flora, mabain er a la fauna. El duai era attrair animals sco casturs, vespras, avieuls selvadis e rustgets dal venter mellen. Quai conferma il selvicultura chantunal Urban Maissen.
Cun la finiziun dal project cumenza però pir propi la lavur – quella fa però la natira da sulet. Il mument è la cuntrada anc pauc biodiversa ed i guarda ora anc in pau grisch. Tenor Urban Maissen giaja quai dus u trais onns fin ch'ins ha plantas e surfatschas dad aua.