Siglir tar il cuntegn

Header

cuntegn

Cussegl federal Er esters pon posseder ovras electricas en Svizra

Oz fa il Cussegl federal sesida. Qua las decisiuns principalas:

Persunas a l’exteriur duain er vinavant dastgar cumprar ovras idraulicas svizras, ovras atomaras sco er raits electricas e da gas. Da quest avis è il Cussegl federal. Da scumandar talas venditas a l’exteriur na saja betg la dretga via da garantir il provediment d’energia en Svizra ha argumentà il Cussegl federal.

La Cumissiun per ambient, planisaziun dal territori ed energia vesa quai dentant auter: Ella vul restrenscher talas vendidas d’infrastructura d’energia ad esters ed estras ed uschia impedir ch’infrastructura critica pudess vegnir controllada d’investurs esters. Il Cussegl naziunal debattescha probablamain l'emna che vegn davart la fatschenta.

Pli ditg en praschun

Tgi ch'è vegnì condemnà ad in chasti en praschun per vita duranta duai vegnir or da la praschun il pli baud suenter 17 onns. Quai propona il Cussegl federal. Oz po ina relaschada cundiziunada vegnir examinà per l’emprima giada gia suenter 15 onns.

Cun questa nova regla pudessan ins differenziar meglier in chasti en praschun per vita duranta d'in chasti en praschun da 20 onns. Uschia argumentescha il Cussegl federal. Tar 20 onns po ina relaschada cundiziunala vegnir examinada suenter 13 onns.

Furmaziun e perscrutaziun

Bunamain 30 milliardas francs. Cun quest import vul il Cussegl federal promover la furmaziun e la perscrutaziun per ils onns 2025 enfin 2028. La finamira saja che la Svizra restia a la testa en ils secturs da la furmaziun, perscrutaziun ed innovaziun scriva il Cussegl federal.

L’augment dal sustegn per 2% ha il Cussegl federal proponì gia il mars. Quai era però vegnì crititgà. La raschun: las expensas en il sectur da la furmaziun èn creschidas pli ferm enfin ussa. Uss pon ils circuls pertutgads prender posiziun. Suenter decida lura il parlament davart las 30 milliardas francs.

Sustegn per ina PUK

Il Cussegl federal è per ina PUK en connex cun la surpigliada da la CS tras l’UBS. Quella duai s’occupar a moda detagliada cun ils eveniments. Quai saja necessari e fetschia senn, uschia il Cussegl federal. Tant il Cussegl naziunal sco il Cussegl dals chantuns pretendan ina PUK per il cas da la Credit Suisse. La PUK duai er intercurir la rolla da las instituziuns en connex cun la Credit Suisse ils onns passads.

Proposta d'acceptar refurma da giustia grischuna

Cun il Gea a la refurma da la giustia il november passà hai era dà intginas midadas vi da la constituziun dal chantun Grischun. Questas midadas correspundian al dretg federal, constatescha il Cussegl federal uss. Perquai propona el en ses messadi al parlament federal d'approvar las midadas.

Cun la refurma da la giustia han Grischunas e Grischuns decidì tranter auter da fusiunar la Dretgira chantunala e la Dretgira administrativa. E da nov datti in secretari general ed ina persuna per l'infurmaziun.

audio
Per tadlar: las novitads da las 11:00
ord RTR Audio dals 02.06.2023.
laschar ir. Durada: 2 minutas 57 Secundas.

RTR novitads 14:00

Artitgels legids il pli savens

Scrollar a sanestra Scrollar a dretga