Il biro dal Cussegl dals chantuns fraina las stentas dal biro dal Cussegl naziunal dad intercurir la surpigliada da la Credit Suisse entras la UBS. Avant che decider sch'i dovra ina cumissiun d'inquisiziun parlamentara PUK vul il biro tadlar la Cumissiun da gestiun GPK, han communitgà ils Servetschs dal parlament. Uschia na datti betg ina decisiun avant il zercladur.
Biro dal Cussegl naziunal vul intercurir deal da la CS
Avant haveva il biro dal Cussegl naziunal decis unanimamain ch'ina PUK duaja intercurir la garanzia statala e co igl è vegnì uschè lunsch che l'UBS ha surpiglià la Credit Suisse. Cunzunt duai vegnir sclerì tge responsabladads che las autoritads han gì.
Gia l'emna passada aveva la Cumissiun da gestiun GPK decis d'intercuri il deal da las bancas,
GPK intercurescha l'agir da la Confederaziun
Han las autoritads ed il Cussegl federal agì endretg durant il collaps da la Credit Suisse? La cumissiun da gestiun (GPK) dal Cussegl dals chantuns ha annunzià retschertgas. En il focus stat tenor la GPK:
- Sche la legislaziun actuala è vegnida applitgada durant il cas da la Credit Suisse
- La surveglianza da las bancas pertutgadas
- L'examinaziun d'alternativas per il spendrament da la Credit Suisse
- Il diever dal dretg d'urgenza dal Cussegl federal
- Ed il management da ristgs da la Confederaziun
Per quai vegn la GPK a discurrer cun ils acturs principals: ils manaders e las manadras da l'Administraziun federala da finanzas, dal Departament federal da giustia e polizia e cunzunt da la Finma, la surveglianza dal martgà da finanzas.
La GPK dal Cussegl dals chantuns vul sa coordinar cun la GPK dal Cussegl naziunal e decider mez matg, sin basa da las retschertgas, sch'i è da cuntinuar cun ina cumissiun parlamentara d'inquisiziun (PUK).
Or da l'archiv
