Themen in diesem Newsticker
- L'ultima sessiun da l'onn è passé
- Cussegl grond surdat incumbensa pertutgant la posta
- Naginas controllas da radar transparentas, però project da pilot
- Lufs-tscherver dal Giura, Rumenia u Slovachia per la Surselva
- Regenza sa posiziunescha cunter l'iniziativa «CHF 200 bastan!»
- Co valitescha la regenza la reducziun da plazzas tar la SRG?
- Ultim di da la sessiun cumenza cun l'ura da dumondas
- Il segund di da la sessiun è a fin
- Dumonda pertutgant pretschs da canortas
- Regenza quinta cun dapli traffic durant ils gieus olimpics
Preventiv 2026 – approvà e sbassà il pe da taglia
Il chantun Grischun ha per l’onn 2026 budgetà in minus da 111,3 milliuns francs. Quai è in deficit marcantamain pli aut che l’onn passà. Lura aveva il chantun anc quintà cun in deficit da 87,2 milliuns francs. Las raschuns èn tenor il chantun las expensas totalas che creschan pli fitg che las entradas totalas. Sin las expensas da bun 3,068 milliardas francs (+3,1%) fruntan las entradas da 2,926 milliardas francs (+2,4%). La gronda part da questas expensas èn en il sectur social, da sanadad e la scolaziun. Ed ina da las raschuns che las expensas creschan main è la reducziun dal pe da taglia per tschintg puncts procentuals dapi il 2024.
Nagin motiv per il parlament da betg sbassar in'ulteriura giada il pe da taglia. Il parlament ha en la sessiun da december decis da sbassar quel per 3%. Cuntrari a la veglia da la regenza e da la cumissiun da gestiun ha il Cussegl grond decis da reducir il pe da taglia sin 92% da la taglia chantunala simpla per il 2026.
En la votaziun finala ha il Cussegl grond decis cun 61 cunter 58 vuschs ina reducziun da taglia da 3%, enstagl dad ina reducziun da 5%. La proposta da la regenza e da la cumissiun da gestiun da mantegnair il pe da taglia n'ha gì nagina schanza.
Credit per dischlocaziun da Brinzauls
Il Cussegl grond ha approvà il credit da 50 milliuns francs per la dischlocaziun preventiva da la populaziun da Brinzauls. Uschia vegnan quellas persunas indemnisadas che vulan ir davent per adina da Brinzauls.
Deputadas e deputads èn tuts stads da l'avis che quest credit saja pli che mo necessaris.
Quai è in pass necessari per dar enavos a la populaziun pertutgada segirtad, stabilitad e perspectivas per il futur
Las pertutgadas e pertutgads avevan peda fin la fin da settember da s'annunziar per la dischlocaziun, pia avant ch'ina bova pussaivla avess destruì il vitg. En tut haja dà 40 annunzias, quai è radund in terz da la populaziun da Brinzauls.
Uss spetga anc la decisiun da la Confederaziun. Lezza duai sa participar cun radund 35% vid ils custs. Quai vegn probabel decis la stad 2026. Fin lura pon las abitantas ed abitants da Brinzauls decider davart trais variantas da dischlocaziun.
Nagina transparenza tar controllas da radar
En il Grischun na datti era en il futur naginas controllas da radar transparentas. Il Cussegl grond ha refusà cun 66 cunter 44 vuschs in'incumbensa da fracziun da la Partida populara Svizra – tenor quella avess la polizia chantunala stuì far transparent cura e nua ch'ella fa controllas staziunaras da radar.
Il tema n'è però betg liquidà. Co la regenza ha communitgà vegni a dar a partir da l'entschatta mars in project da pilot da tschintg mais. Quai en consequenza ad ina dumonda da Maurus Tomaschett (Center) l'entschatta dal onn. Silsuenter vegni a dar in'evaluaziun.
