Themen in diesem Newsticker
- Pli baud saira sontga
- Eliminar triep Sinestra
- Prest a fin
- Ferm signal per la plurilinguitad
- Liquidar dumondas ed incumbensas
- Incumbensa d’avrir pli baud il pass d’Alvra
- In Gea unanim als projects d'infrastructura
- Datti 35 milliuns per infrastructura?
- Lescha da tgira sut tetg
- Tgira dat vinavant da discuttar
Sustegn per persunas che tgiran lur confamigliars
En il rom dal plan d’acziun da l'Uffizi da sanadad dal Grischun datti sustegn per persunas che tgiran lur confamigliars. Uschia survegnan confamigliars en il futur 300 fin 600 francs per mais per la tgira. Questa revisiun parziala da la lescha da tgira duai ir en vigur il cumenzament dal 2027.
Tenor il messadi da la regenza è quai in tema che vegn survesì en l'entira Svizra. Tenor stimaziuns surpiglian enturn 600'000 persunas en Svizra mintga di la responsabladad per lur geniturs attempads, partenaris e partenarias malsaunas u confamigliars cun impediment – quai per gronda part senza avair ina scolaziun e senza sustegn u indemnisaziun finanziala.
Il chantun Grischun quinta cun custs annuals da 2,4 milliuns francs. Il tema è gia pli ditg sin maisa. Il 2015 aveva Marcus Caduff, da lez temp deputà, pretendì mesiras per sustegnair confamigliars.
Lescha da polizia 2.0
La segunda part da la lescha da polizia è revedida. Unanimamain ha il Cussegl grond ditg Gea ad intginas adattaziuns en la lescha da polizia chantunala. Tranter auter è uss reglà per tge che la polizia dastga duvrar maletgs da cameras automatisadas che controlleschan il traffic; quai è per exempel il cas per impedir e persequitar delicts u era per tschertgar persunas sparidas u fugidas. Per delicts pitschens u bagatellas na dastga la polizia betg duvrar las cameras. Sper quai prescriva la lescha revedida er tgi ch’ha invista en las datas e quant spert che quellas ston vegnir stizzadas.
Vitiers è uss er reglà ch'uffants e giuvenils ston vegnir protegids tar investigaziuns – ed er detagls da la survigilanza secreta vegnan reglads en la lescha revedida. Las midadas duain ir en vigur il cumenzament dal 2026. Gia l’avust ha il Cussegl grond revedì ina part da la lescha da polizia, quai tranter auter cun precisar mesiras tar smanatschas.
Il Tribunal federal ha enumerà il 2022 tge premissas che valan per surveglianzas automatisadas sin vias. La lescha da polizia grischuna enconuscha dapi il 2018 in artitgel per la «tschertga automatisada da vehichels». Quel è dentant memia diffus e na satisfa betg a las premissas da Losanna. Perquai duai ussa vegnir enumerà a moda clera cura che la Polizia chantunala dastga insumma duvrar maletgs da talas cameras (detagls en la boxa).
Credit supplementar per infrastructuras relevantas per il sistem
Avant diesch onns ha il Cussegl grond decidì da dar in credit da 80 milliuns francs per l'infrastructura relevanta en il chantun. Pli tard ha il Cussegl grond decidì da reservar 35 da quests 80 milliuns per ils projects da l’access da l’internet cun extender il bindel ultra lad.
Dal 2017 enfin il 2024 ha la regenza concedì daners per 26 projects che vegnan u èn vegnids sustegnids. Tranter auter il bogn cuvert ed albiert da giuventetgna a Laax, in ulteriur edifizi sin il campus medicinal a Tavau u l’arena da biatlon a Lai.
Ils raps, ch’èn reservads per l’internet, mancan en quest credit per l’infrastructura ed uschia ha il Cussegl grond decidì il favrer 2025 d’augmentar il credit per ulteriurs 35 milliuns francs. Questa sessiun ha il Cussegl grond decidì da conceder quest credit.
Cun il credit supplementar duain vegnir sustegnids projects sco per exempel la construcziun da l’infrastructura da far naiv a Mustér, Tschierv e Scuol, projects d'Origen e la nova halla per eveniments a Cuira. Quests ulteriurs 35 milliuns francs vegnissan finanziads or da las entradas disponiblas dal chantun. Quest credit fiss limità enfin l’onn 2030, vul dir che la regenza sto conceder ils projects enfin lura.