Il luf resta tema
Tranter la coexistenza dal luf e da l’uman en Grischun na sa mida nagut – quai ha il Cussegl grond decidì cun betg surdar in’incumbensa correspundenta. La sanestra vuleva tranter auter dapli paja per pasturs – u er organisar meglier la gestiun da rument e cadavers per betg attrair lufs. Sper quai ha ella proponì da reducir il dumber da tschiervs per regular la populaziun dals lufs. Tant la regenza sco er la maioritad burgaisa en il Cussegl grond èn da l’avis ch’i na dovra betg questas mesiras, uschia che l’incumbensa n’ha gì nagina schanza.
Nagin formular obligatoric per locataris
Tant la regenza sco er il cussegl grond na vulan savair nagut d’in formular obligatoric per locataris – per vegnir a savair il tschains da l’anteriur locatari. Tenor ils socialdemocrats gidass l’introducziun d’in tal obligatori cunter tschains memia auts.
Ils socialdemocrats n'han dentant gì nagina schanza encunter la maioritad burgaisa en il Cussegl grond – l'incumbensa d'introducir l'obligatori per in formular n'è perquai betg vegnì surdà a la regenza. Quai formular avess mussà ils tschains ch'il locatari precedent pajava, ensemen cun ina decleraziun daco ch'ils tschains èn vegnids pli chars.
La PS è da l'avis ch'in tal obligatori gidass encunter tschains memia auts e fiss era pauc birocratics. Da vart burgaisa hai dentant gì num ch'i na dovria nagin obligatori, cunquai che locataris possian gia uss pretender questas infurmaziuns – ed ins vesia en auters chantuns ch'han introducì in obligatori che quel portia pauc u nagut. La regenza ha sper quai anc argumentà che cunzunt las vischnancas sajan vidlonder da prender mesiras encunter tschains memia auts.
La dretgira administrativa dal Grischun duai vegnir pli digitala
Da questa opiniun è er il Cussegl grond. El ha acceptà in’iniziativa parlamentaria che vegn da la cumissiun da giustia e segirezza: L'iniziativa vul en emprima lingia che la correspundenza da la Dretgira administrativ possia vegnir inoltrada electronicamain. Quai era fin uss mo il cas tar dumondas dal dretg civil e dretg penal. Cun quai ch'igl è per part gia pussaivel, pudessi tenor la cumissiun vegnir tar battibugls u malsegirezzas.
Ussa va quai vinavant a la cumissiun da giustizia e segirezza dal Cussegl grond che metta sin via la revisiun parziala da la lescha correspundenta. Ella duess ir en vigur il cumenzament dal 2025 cur che las duas dretgiras grischunas vegnan messas sut in tetg. La revisiun da questa lescha è ina soluziun transitorica fin che la lescha federala va en vigur.
19 milliuns francs per center da scolaziun
Il Cussegl grond ha concedì in credit da var 19 milliuns francs per in nov center da scolaziun per la protecziun civila. Quel vegn realisà al Meiersboda sin il territori da la vischnanca da Churwalden. Il nov center duai remplazzar il center existent ch'è vegnì bajegià ils onns 70. Il nov bajetg vegn surtut construì per motivs da persistenza e custs.
Il sulet ch'ha dà da discutar en il parlament era il lieu: Meiersboda saja in lieu fitg sumbrivant. Lura na portian ils indrizs solars sin il tetg betg bler. Tuttina è il project vegnì tras il parlament unanimamain. Il settember sto anc il suveran dar il consentiment a l'urna. La construcziun duai lura cumenzar la primavaira 2025.
Pled d'avertura cun sguard en l'istorgia da las trais lias
La secunda sessiun da l’onn dal Cussegl Grond grischun è averta. Cun dar in sguard en l’istorgia ha il president dal Cussegl Grond, Franz Sepp Caluori lantschà la sessiun. Caluori ha fatg in excurs tar il cumenzament da las trais lias ed uschia tar il stadi liber Grischun. El ha cità il filosof Immanuel Kant e ditg: «Hajas il curaschi da duvrar tes intellect». E quai duaja valair per ils deputads e las deputadas ils proxims dus dis.
Tge spetga questa sessiun?
La sessiun d'avrigl è ina curta, ella cumenza glindesdi suentermezdi e finescha mardi saira. Perquai n'hai era betg bleras tractandas; glindesdi suentermezdi vai liber cun il messadi per il nov bajetg per la protecziun civila sin il Meiersboda. Là vai per prest 19 milliuns francs ed il suveran sto lura er anc dar ses consentiment. Cun grondas discussiuns n'èsi betg da quintar cunquai che la cumissiun preparatorica è cuntenta cun il messadi che la regenza ha preschentà.
Auter pudessi guardar ora tar il program da vias 2025-2028. Quel sto il Cussegl grond bain mo prender per enconuschientscha, tuttina èsi la chaschun per plazzar critica u giavischs. Cunzunt era cunquai che la regenza ha annunzià l'emna passada da vulair far vinavant cun ils sviaments a Sta. Maria e Susch – e vul er far pli segira la via tranter Segl Föglias e Plaun da Lej.
Banca Chantunala chaschuna dumondas
Il mardi cumenza lura cun l'ura da dumondas ch'ha uschiglio ses plaz la mesemna bun'ura. E cunzunt las lingias grassas da las davosas emnas enturn la Banca Chantunala Grischuna procuran per inqual dumonda. Deputadas e deputads vulan tranter auter savair sche la regenza è da l'avis ch'igl è serius da laschar investigar l'agen post da revisiun las renfatschas. La regenza ha gia il glindesdi prendì posiziun a scrit en ina communicaziun; ella prenda per enconuschientscha il rapport dad Ernst & Young, i dettia dentant basegn d'agir en connex cun la governance, perquai veglia la regenza grischuna sa barattar cun il cussegl da banca e sper quai laschar far in'analisa cumplessiva.