30 meters ha mesirà il camiun ch'aveva chargià la passerella. L’emprim fissi atgnamain stà prevedì da far il transport sur il pass dal Flüela, raquinta l’architect Patrick Gartmann, il proprietari da la passarella. Ma sin lezza ruta avessi gi ina punt ed intginas stortas che fissan stadas memia stretgas
Ins ha pia prendì la via sur il Güglia. Ma era sin lezza ruta datti stretgas e tschancuns difficultus, per exempel la punt a Samedan. Per ch’i reusseschia senza incaps han ins stuì montar giu il tetg da la passarella e tranportar lez da per sai.
Transport da notg
Il transport han ins fatg ina notg l’entschatta fanadur – cun in camiun, ina crana pneumatica e trais vehichels d’accumpagnament. Patrick Gartmann ha filmà il viadi. Ha el gì tema che sia passarella stettia forsa fitgada insanua en ina chantunada?
Mo ina giada hai jau gì starment – cura che la blatga-camiun ha strivlà la punt da la viafier retica a Samedan
Mez onn temp per inoltrar project
Uss stat la passarella a Susch damanaivel da la chasa da Patrick Gartmann. Las autoritads communalas èn infurmadas e l’architect sto inoltrar ils proxims sis mais ina dumonda da bajegiar.
Fin avant tschintg onns colliava la passerella ils dus bajetgs dal Museum d’art a Cuira. Ella è vegnida construida dal trio d’architects Peter Zumthor, Peter Calonder e Hans-Jörg Rusch.
Cura ch’ins ha renovà e bajegià enturn il museum, vuleva il chantun spazzar la passarella. A Patrick Gartmann avessi rencreschì sche quest bain cultural fiss svanì en ina brischera da rument. El ha salvà il bajetg filigran e surpiglià ils custs da montar giu e dischloccar.
RR actualitad 17:00
