Per la secunda giada aveva Ivo Rohrer candidà l'onn passà per il post dal president communal da Tusaun. Lura aveva el fatg bunamain dus terzs da las vuschs ed era uschia vegnì elegì cleramain. Quai era avant bundant in onn, il november 2024.
La communicaziun or da la chasa-cumin da Tusaun ha perquai procurà per ina surpraisa mardi suentermezdi: Ivo Rohrer (PVL) e ses substitut Werner Elmer (senza partida) demissiuneschan omadus per la fin da mars da l'onn proxim.
Il sustegn manca
Ord la communicaziun pon ins leger ch'il motiv decisiv per la demissiun saja stà la mancanza da sustegn entaifer la suprastanza per realisar las refurmas planisadas. Il president da 44 onns haja vulì restabilir las finanzas da la vischnanca en la regiun Viamala. Quai haja chaschunà cuntravent en il gremi da set persunas.
Igl è sco in cumbat cunter mulins da vent. E qua èsi sa mussà: Uschia na poss jau betg realisar las midadas avisadas.
Per Ivo Rohrer è cler: Mesiras da spargn sajan insatge malempernaivel e nagut cumadaivel. La suprastanza haja bain gia pudì metter emprims terms, ma il restabiliment saja in process da lunga durada. E senza sustegn da l'entir cussegl communal na saja in ulteriur progress betg pussaivel.
Nagin'allianza da quatter pli?
Avant in onn – durant il cumbat electoral per ils sezs en la suprastanza communala – parevan ils quatter candidats novs dad avair furmà in'allianza politica. Vegnì elegids èn els tuts – tranter quels quatter era Ivo Rohrer e Werner Elmer.
Leo Bassy, in dals candidats da gliez temp ed uss commember da la suprastanza a Tusaun, na vesa quai betg uschia. Tenor el n'haja mai dà ina tala allianza politica. Els quatter sajan simplamain sa preschentads ensemen durant quai temp.
La suprastanza communala n'è mai s'opponida cunter refurmas u mesiras da spargn. Valitaziuns differentas davart il proceder tutgan tar in'executiva.
Era Leo Bassy è da l'avis che Tusaun stoppia spargnar – da quell'opiniun saja l'entira suprastanza: Ma betg per tut pretsch.
Co vinavant
Las fatschentas uffizialas vegnian surdadas pass per pass durant las proximas emnas – quai pon ins leger en la communicaziun da la vischnanca.
Werner Elmer dat gia giu ses post sin la fin da l'onn, resta dentant anc en la suprastanza fin la fin da mars. In nov vicepresident duai vegnir elegì l'emna proxima or da las retschas da la suprastanza actuala per che la vischnanca restia era da tut temp abla d'agir.
La primavaira vegnan lura duas novas persunas elegidas per cumplettar il cussegl communal – ina da quellas surpiglia en quest cas il presidi.