La pli gronda differenza tranter Cuira e Friburg – pertutgant la purschida per persunas dependentas è – che Cuira n'ha nagin local da consum. Anc nagin. Quel vegn anc.
Il mument èsi previs fin la fin da quest onn u l'entschatta 2026. Ensemen cun il nov local da consum sa chasa era il post da contact e la cuschina da via, tuts dus purschidas gia existentas, en las localitads da l'anteriur Palazzo Bowling en il Seilerbahnweg 7 en il Welschdörfli.
Ed i dettia era ponderaziuns che l'Uffizi dal servetsch social dal Grischun saja preschent en il nov lieu, di la manadra da quel, Susanna Gadient.
Quai n'avain nus anc betg decidì. Forsa èsi lura uschia che persunas che lavuran ussa tar il servetsch social van lura per intginas uras en il Seilerbahnweg 7 e fan là la cussegliaziun. Nus stuain anc chattar or tge ch'è il meglier e co che nus savain porscher.
En la nova localitad en il Seilerbahnweg 7 vegnan damai pliras purschidas per persunas dependentas ad esser sut il medem tetg. Ma quai na saja nagut nov, di Susanna Gadient.
Gia ussa dettia a Cuira, che ha ina da las pli grondas scenas da drogas avertas da la Svizra, ina purschida sumeglianta sco quella a Friburg, per reducir las consequenzas negativas dal consum da drogas per consumentas e consuments e per la societad.
A Cuira è quai in'uniun che porscha tranter auter in post da contact. E là datti tut las purschidas sco a Friburg, er sut in tetg.
Concretamain dat il post da contact la pussaivladad a persunas dependentas da pussar en ina stanza da dimora, ellas pon sa lavar e lavar vestgadira, i dat access a squittas e guglias nettas, in simpel provediment da plajas ed ellas pon sa laschar cussegliar a moda simpla e nunbirocratica.
Là vegnan lura bajegiadas las pussaivladads per ir per auter sustegn. Forsa per sustegn da cussegliaziun per l'agid social per quels e quellas ch'èn pertutgadas. U forsa datti era persunas che vulessan ir en ina terapia, er quai è ina pussaivladad. Ed er d'avair in pau ruaus en quel spazi.
Sper il post da contact èn era las stanzas per star sur notg, enconuschentas sco Notschlafstelle, la cuschina da via e posts che sustegnan il return en il martgà da lavur e tar l'abitar, da chattar sut il medem tetg. En las localitads da l'Uniun «Agid per surviver Grischun» en il Hohenbühlweg 20, damanaivel dal Lindenquai in pau si dal munt en direcziun Malix.
Infrastructura manca per metter tut sut in tetg
Damai sumegliant sco Friburg. Simplamain senza local da consum. E sco menziunà, cura che quel arriva, midan damai il post da contact e la cuschina da via da la via Hohenbühl en il Welschdörfli. Entant che la Notschlafstelle, il sustegn da lavur e quel per abitar restan nua ch'els èn ussa.
Da metter tut las purschidas per persunas dependentas fisicamain sut in tetg a Cuira na saja numnadamain betg pussaivel, declera Susanna Gadient. Surtut l'infrastructura manca. Ins ha vis tar la tschertga da la localitad per il local da consum cun post da contact, quant grev ch'igl era da chattar in lieu adattà – era pervia da las reacziuns da la populaziun. Quella less talas instituziuns plitost betg memia damanaivel da l'atgna chasa.