Cuira ha ina da las pli grondas scenas da drogas avertas da la Svizra. En il Stadtgarten amez il center da la chapitala grischuna s'inscuntran regularmain persunas dependentas. L'agressivitad e la criminalitad èn s'augmentadas ils ultims onns.
Co ch'ins pudess prender per mauns il problem da la scena da drogas averta mussa l'exempel da Friburg. La Confederaziun lauda lur post da consultaziun per persunas dependentas da drogas sco exemplaric per autras citads svizras.
Tut sut in tetg
Era Friburg ha ina scena da drogas, ma quai che differenziescha Friburg dad autras citads svizras è che persunas dependentas chattan là tut las impurtantas purschidas sut il medem tetg. En in grond edifizi, in pau zuppà e davent da la fulla da glieud. Radund 10 minutas davent da la staziun. «Le Tremplin», «il trampolin» sa numna quella instituziun.
La suprastanta da la citad da Friburg, Mirjam Ballmer, dumbra si envers SRF tge che vegn tut ensemen: Per l'ina dettia il servetsch social che s'occupa da las persunas cun problems da dependenza. Lura haja er ateliers che porschan ina pussaivladad d'occupaziun per ils pertutgads. Ma er in local da consum chattian ins dapi dacurt en l'instituziun «Le Tremplin» da la citad da Friburg.
I dat anc ulteriuras purschidas, sco per exempel ina cuschina da via cun da mangiar. Tut questas èn plazzadas al medem lieu.
Schizunt ina cuschina da via cun spaisas per las persunas dependentas saja part dal «Tremplin» – e tut quella schelta da purschidas èn pia plazzadas al medem lieu. Uschia survegnian las persunas dependentas agid da tut las varts. Lavurantas socialas e persunas dal fatg da drogas tschertgian da porta a porta e da cas a cas soluziuns. Quai fetschia pli simpel a las persunas dependentas il pass enavos en la vita sociala e professiunala.
Il mintgadi en il «Tremplin»
Co ch'il mintgadi guarda ora en il «Tremplin» descriva il directur Yan Desarzens uschia envers SRF: Insatgi po arrivar la damaun en il «Tremplin», baiver in café, ed insatgi declera là ch'el u ella po liquidar ina pitschna lavur per gudagnar in gentar – chaud e saun. Là èsi era pussaivel da s'inscuntrar cun ina lavuranta sociala. Organisar daners na possian ins betg, ma gidar da pajar quints e far in budget. E sch'insatgi vul consumar drogas, na tramettian els betg davent quella persuna mabain tar la stanza da consum.
La suprastanta da citad da Friburg, Mirjam Ballmer, sa tge ch'ella ha dal «Tremplin»: «Per mintga citad che ha ina funcziun da center è ina tala instituziun fitg impurtanta», di la politicra da la partida verda envers SRF.
Il bun exempel per autras citads
Quai che Friburg – che ha dal reminent quasi medem bleras abitantas ed abitants sco Cuira – ha bajegià si, duain er autras citads sumegliant grondas realisar, chatta Frank Zobel, il vicedirectur da la «Fundaziun Dependenza Svizra». Quai che vegnia fatg a Friburg saja che tut ils exponents e las exponentas s'inscuntrian era là, era cun la polizia. Ed ils cas ed ils problems vegnian discutads cuntinuadamain. Ins tschertgia cuntinuadamain soluziuns. Sumegliant vesa quai er il BAG, l'Uffizi federal da sanadad. Quel ha ludà il model da Friburg dacurt en ina dieta sco bun exempel per l'entira Svizra.
Las persunas che vegnan ensemen en il «Tremplin» n'han naginas vitas simplas, ma senza il «Tremplin» fissi anc pli grev. I saja in pau zuppà ed ins mangia bain qua. E la glieud gidia fitg, di in um envers SRF.
Ed in segund pertutgà arriva tut euforic. El haja gia fatg experientschas cun bleras talas instituziuns, ma nagina saja sco questa. Qua mangian ins bain, ins vegnia tractà bain, survegnia adina agid per tut, era sch'ins n'haja betg tut ils documents. Ils exempels mussan: la glieud è engraziaivla al «Tremplin». Senza quest post da consultaziun vivessan bleras dad ellas sin via.