Sch'ins sa fa mal ed ha ina plaja, tgir'ins quella. Sch'ella è greva, van ins tar la doctoressa u tar il medi. Tar persunas fermamain dependentas da drogas è quai in pau auter. La tgira da l'agen corp n'ha savens betg pli uschè ina gronda prioritad. E d'ir en in ospital è savens in obstachel memia grond. Empè da stuair ir insanua per agid, vegn l'agid perquai ussa tar ellas ed els en il Stadtgarten.
Dus anghels per il Stadtgarten
Ins haja qua dus anghels – ina tgirunza, Sina Baechler, e la presidenta da l'Uniun d'agid Cuira, Corina Pfiffner-Frischknecht – ch'organiseschan mintga duas emnas, la mesemna suentermezdi, la tgira da plajas. Quai di Reto Küng, il president da la baselgia refurmada da Cuira, ch'aveva cun-inizià la fin favrer da quest onn in clom d'agid da quella ensemen cun l'Uniun d'agid Cuira en furma d'ina brev da lecturas en la gasetta Südostschweiz. I gieva persuenter da chattar persunas dal fatg che pudessan tgirar las pajas da las persunas dependentas en il Stadtgarten ed uschia meglierar là la situaziun da sanadad. Quai è reussì.
Las duas dunnas a la front veglian s'engaschar senza esser visiblas e perquai era senza s'exprimer envers RTR. E quest engaschi fetschia fitg basegn, di Reto Küng. I sa tractia da plajas che na vegnan uschiglio probabel betg tgiradas. I dettia numnadamain per part schizunt persunas che na tirian betg pli or ils chalzers, descriva Reto Küng la situaziun en il Stadtgarten. Quai sajan maletgs amez la citad che dettian propi da ponderar.
Sch'ins vul cumbatter la suffrientscha, lura na ston ins betg tschertgar lunsch sin la carta dal mund, quai datti era qua davant porta.
La tgirunza Sina Baechler haja savì gudagnar spert la fidanza da las persunas en il Stadtgarten, nua ch'ella tgira, dapi mez matg, mintga segunda mesemna, las plajas da las persunas dependentas en ina pitschna chasina da curtin. Reto Küng di che las persunas dal Stadtgarten apprezieschian la purschida. E Sina Baechler fetschia sia lavur «a moda fitg calma, fitg professiunala, fitg resalvada e fitg quieta». E quai vegnia apprezià fitg.
Buna preparaziun
Per pudair porscher l'agid medicinal haja dentant duvrà preparaziun. La tgirunza ha perquai accumpagnà streetworkers da Cuira – che visitan regularmain las persunas dependentas en il Stadtgarten – per porscher lur sustegn, sa preschentar tar las persunas en il Stadtgarten e per raquintar tge ch'ella fa. Ins na po gea betg simplamain vegnir e far, senza che las persunas pertutgadas san da quai. E perquai n'è quai era betg per schabetg che la tgira da las plajas ha lieu mintga segunda mesemna suentermezdi.
Ina persunalitad impurtanta per nus en il Stadtgarten è Werner Erb, ch'è gia dapi 12 onns mintga mesemna suentermezdi là cun sia gruppa da tibas.
Mintga mesemna suentermezdi chattan ins Werner Erb e sia gruppa da tibias en il Stadtgarten – e quai gia dapi 12 onns. El na suna betg mo musica, mabain ha era quità da las persunas là, porta vestgadira ed mussa ina gronda acceptanza. Werner Erb saja perquai ina figura centrala per quest project. El sa gidia a stgaffir ina colliaziun cun las persunas en il Stadtgarten, che na tgiran mintgatant betg uschè bain lur corp. Lura motiveschia el era ils pertutgads da laschar tgirar lur plajas.
Visiuns per il futur
Sper la purschida actuala sajan ins per il mument er en contact cun ina media per forsa pudair porscher en il futur tests da hepatitis ed aids. E sch'ins chattass anc ina segunda persuna dal fatg pudess'ins porscher la tgira da plajas mintg'emna empè da mintga segunda – quai enfin che la stanza da consum avra sias portas. Lezza stuess era cuntegnair questa purschida. Per il mument stuess quai esser il cas la fin da quest onn u l'entschatta 2026.