Siglir tar il cuntegn

Header

cuntegn

Derschader administrativ Procedura da surveglianza è annullada

La procedura da surveglianza cunter il derschader administrativ ch'era vegnì inculpà l'onn passà da violaziun vegn annullada. Quai ha decis la cumissiun per giustia e segirezza dal Cussegl grond. Cunquai ch'il derschader haja demissiunà per la fin da l'onn saja la procedura daventada obsoleta, uschia l'argument. Quella n'haja betg gì ina finamira penala – i fiss ì per giuditgar las renfatschas tenor il dretg da surveglianza.

La cumissiun haja stuì proceder cun quità ed observar tut ils dretgs e tut las garanzias processualas dal derschader pertutgà. Per l'inquisiziun penala da las renfatschas saja vinavant responsabla la procura publica, hai num vinavant.

Il december era vegnì enconuschent ch'i marschia inquisiziuns penalas cunter il derschader. Ina praticanta aveva denunzià el pervia da rinfatschas da violaziun.

Remplazzar la plazza

La pli gronda prioritad per la cumissiun per giustia e segirezza dal Cussegl grond ha uss l'elecziun substitutiva per ina nova derschadra administrativa u in nov derschader administrativ. Quella saja previsa per la sessiun da zercladur 2023. Vinavant tschertgian ins per motivs dad ina demissiun e la reorganisaziun da las dretgiras chantunalas superiuras derschadras e derschaders extraordinaris.

audio
Per tadlar: curt e cumpact
ord RTR Audio dals 24.01.2023.
laschar ir. Durada: 1 minuta 3 Secundas.

RTR novitads 09:00

Artitgels legids il pli savens

Scrollar a sanestra Scrollar a dretga