Las destinaziuns turisticas dumandadas spetgan ina buna stad. Dapi la pandemia ha il Grischun adina gì blers giasts durant la stad. Questa stad fan las regiuns turisticas quint cun pli paucs giasts svizzers e puspè dapli giasts internaziunals. Las persunas ch'arrivan en vacanzas reservan ils hotels e las abitaziuns da vacanzas er adina dapli a curta vista. Uschia po la situaziun midar spert.
Sch'igl è bell'aura arrivan els uss, uschiglio spostan els las vacanzas sin pli tard. I para ch’ils giasts daventan pli e pli flexibels.
Sco che la stad vegn ad attrair glieud, è tenor las prognosas da las destinaziuns sumegliant:
- La Surselva e Tavau Claustra fan quint cun ina buna stad e cun reservaziuns spontanas.
- En la destinaziun Engiadina San Murezzan datti differenzas entaifer la destinaziun: En l'Engiadina fan els quint cun 10 fin 15% pli paucs giasts. A San Murezzan percunter vegnan puspè spetgads dapli giasts internaziunals. Sche las temperaturas daventan en tut il chantun fitg chaudas, alura fa l’Engiadina quint cun reservaziuns spontanas, cun quai ch'i vegn ad esser in zic pli frestg.
- Il medem quinta per la destinaziun Engiadina Bregaglia, dentant fan els quint che la stad na vegnia betg ad esser uschè buna sco ils onns avant.
- A Cuira e conturn vegn percunter spetgà ina stad cun dapli giasts che l’onn avant. I duessan vegnir pli paucs giasts svizzers ch'usità e dapli giasts internaziunals.
