Di da chalira - Far bogn, segar, viandar e servir giasts en la chalira

Mardi è stà il chaud di da quest'unda da chalira. En Grischun è creschì il termometer il pli fitg en la regiun da Cuira – numnadamain sin fin a 37 grads. En las muntognas èsi stà in zic pli frestg, uschia il meteorolog da SRF Meteo. Sin 3'000 meter sur mar, per exempel sin il Corvatsch, hai anc dà 11 grads.

Tge han las Grischunas ed ils Grischuns fatg tar quest di da chalira? Nus avain accumpagnà intgins dad els:

Lai da Padnal a Ftan

Mo tschintg minutas dovr'ins per arrivar tar quest lai da bagnar davent da Ftan. L'onn 2019 è il lai vegnì fabritgà, quai per radund 400’000 francs. Plantas surpiglian la lavur da nettegiar l’aua e sch’i fa da basegn datti la pussaivladad dad emplenir cun nova aua. Il lai da Padnal vegn nizzegià da giasts ma era da la populaziun indigena. Oravant tut la giuventetgna da Ftan sa chatta là vers saira cura che las temperaturas èn pli miaivlas.

Enturn il lai ha il visitader la pussaivladad da chaminar sin ina senda, lura datti gardarobas, bancs e maisas e natiralmain era lieus per star a sulegl. Mintgin che nizzegia la purschida è sez responsabel per la segirtad.

A Cuira tar lavurs da curtin 

La gruppa da ortulans da Cuira lavura da tutt'aura ordavert. Segar il pastget, zerclar las vias da glera e bagnar las fluras en il santeri da la catedrala a Cuira - quai stat mardi suentermezdi sin il program. Part da questa gruppa fa er Corina Bundi. Ella e ses collegas da team emprovian da far l’avantmezdi lavurs en il sulegl, per lura pudair lavurar il suentermezdi en la sumbriva. Per il solit funcziunia quai pulit.

Crema da sulegl sco er avunda aua da baiver ha il team d'ortulans adina a disposiziun. Propi vess na fa il team betg questas temperaturas. E l'entira gruppa accentuescha er ch'i giaja bain cun els. Tgi che lavuria per exempel sin il bajetg u sin via na possia betg profitar da la sumbriva da las plantas. Fastidis fetschian però las midadas da temperaturas. In'emna da 30 grads, lura ina emna 20 grads e suenter puspè 30 grads, quai saja intensiv per il corp, ha in commember da la gruppa tradì.

A Cuira sin terrassa d’ustaria

Tgi che visita la stad ina citad enconuscha: Pli chaud ch’igl è e meglier ch’ina bavronda fraida en la sumbriva fa. Sin la terrassa dal Café Arcas survegn la clientella omadus. Curt avant mezdi visita RTR la terrassa amez la citad veglia da Cuira. Tgisa sche l’ustaria fa spezialas preparativas per tals dis da chalira? E cun tge sfidas ha il persunal da sbatter da servir bavrondas e glacés tar temperaturas fin a 36 grads?

Muottas Muragl

Perfin en Engiadin’Ota annunzia la Meteo temperaturas da fin 26 grads. Per Engiadinaisas ed Engiadinais e tut quels che giaudan lur vacanzas gia magari chaud!

In’alternativa per respirar aria pli frestga è dad ir si ad aut. Per exempel sin ina muntogna, accessibla cun ina funivia. Quella da Muottas Muragl per arrivar sin 2'454 meters sur mar. Dad ina vart in lieu cun ina vista imposanta vers ils lais da l’Engiadin’Ota, da l’autra era punct da partenza per differentas gitas. Qua è la prognosa 18 grads.