La destinaziun Bregaglia e l’Engiadina Auta han lur vischinanza a l’Italia sco avantatg. Blers frontaliers e frontalieras arrivan sur il cunfin per lavurar en il turissem. «Nus profitain da tut il persunal da fatg che deriva da l’Italia», di Eli Müller, la responsabla Bregaglia Engiadina Turissem.
Manaders da tschellas grondas destinaziuns sentan dentant la mancanza da persunal: en las regiuns da la Surselva, a Scuol, Samignun, Val Müstair, San Murezzan e Tavau Claustra. I è stà in dals temas gronds als dis da turissem a Tavau.
Gudagnar novs collavuraturs cun in nov model
La Banca Chantunala Grischuna lavura dapi circa diesch onns cun in nov model. Tenor ella veglia la nova generaziun da lavurers e lavureras tschantschar cun, vesair in senn davos la lavur e lavurar ordaifer d'ierarchias. Quai duai il model da lavur resguardar:
- En il center è la responsabladad persunala e betg da lavurar exact tenor la descripziun da plazza.
- La furma d’organisaziun: betg tenor in organigram classic, ed evitar las rollas classicas da scheffas e subordinads.
- La furma da lavurar: collavuraturas e collavuraturs pon lavurar en il biro ed a chasa.
- Collavuraturs e las collavuraturas pon duvrar l’energia per atgnas lavurs e betg mo far la lavur ch’il schef u la scheffa scrivan avant.
Intginas sfidas per implementar en il turissem
Il model da lavur funcziunia per tut las generaziuns, di Daniel Fust, CEO da la Banca Chantunala Grischuna. Da transponer quest model da lavur sin il turissem è in zic pli grev, cunquai ch’ins na po betg adina lavurar en il biro u a chasa. Tar ina pendiculara, tar ina recepziun u en il service sto il persunal esser avant lieu. E perquai ston alura esser las uras da lavur gistas en il turissem.
Sco che la demografia e la digitalisaziun mida la fiera da lavur è pia stà tema als dis dal turissem. Plinavant han ins er discutà sur il ferm franc svizzer. Quel fa dentant puspè pli attractiv da lavurar en Svizra.
