Il cudesch «Krisenmanagement neu fokussiert» che Christian Gartmann ha scrit è in agid per organisaziuns e stabs da crisa e spezialmain per persunas dal fatg ch'èn confruntadas cun situaziuns en muments extraordinaris da crisa.
Il manager da crisa ed anteriur schurnalist ha intervistà diversas persunas ch'han accumpagnà lur concerns u vischnancas en in temp da crisa. Ma era cun persunas ch'han da lavurar en situaziuns extraordinarias u ch'han en lur lavur da sa fatschentar cun grevs destins.
«L'impurtanza dal dialog cun ils pertutgads è creschida marcantamain» di il manager da crisa. Ins stoppia chapir els e lur situaziun e lura ins possia far els ina part da la soluziun.
Management d'eveniments e crisas
Ina sfida saja la dischinfurmaziun che fetschia vegnir malsegira las persunas pertutgadas. La dischinfurmaziun na difficultescha betg mo la lavur, mabain possia er esser fitg feribla per las persunas pertutgadas. Ina da las incumbensas da la communicaziun da crisa saja perquai er la protecziun da las persunas pertutgadas cunter ina tala dischinfurmaziun.
Swissair 111
In schabetg ch'ha midà la moda e maniera da la communicaziun da crisa è la crudada da l'aviun Swissair 111 il 1998 a Halifax avant la costa dal Canada. Beatrice Tschanz ha cun sia communicaziun averta ed empatica midà la branscha da communicaziun da crisa.
Communitgar quai ch'ins sa il mument e communitgar er quai ch'ins na sa betg saja daventà per dir uschia in standard, er sch'i dettia anc oz exempels nua ch'ina communicaziun transparenta na saja betg il cas, raquinta Gartmann.