Siglir tar il cuntegn

Header

cuntegn

Dis d'acziun «Orange days» «Cun terapia d'art vulain nus sustegnair dunnas»

En il rom dals «Orange days» – ils 16 dis cunter violenza envers dunnas – organiseschan las duas terapeutas d'art Karin Rüegsegger e Sara Adzayi-Nussio ina saira per tut quellas e quels che vulan exprimer lur sentiments en art. Ellas fan quai cun arschiglia e colur.

Gia l'onn passà han las duas terapeutas d'art decidì da sa participar als dis d'acziun cunter violenza envers dunnas. Quai saja in impurtant tema che muventia fitg ella, di Karin Rüegsegger ed ellas veglian dar ad uschè bleras e blers la pussaivladad dad ina giada empruvar terapia d'art.

En lur atelier, ina stanza cun figuras d'arschiglia e l'autra cun utensils da malegiar, envidan ellas tut quellas e quels ch'han interess d'emprender d'enconuscher quella moda e maniera da terapia:

Mintgatant na chattain nus betg ils endretgs pleds, ma chattain persuenter ina via da s'exprimer en l'art.
Autur: Sara Adzayi-Nussio terapeuta da malegiar

Tar ella en l'atelier vegnan persunas da tuttas vegliadetgnas. Intgins dad els malegian simplamain gugent, per las autras èsi ina furma da terapia. I dettia persunas che hajan emprendì enconuscher quella terapia en la clinica e vulan cuntinuar autras hajan uschiglio simplamain ina greva fasa da vita, di Sara Adzayi-Nussio.

audio
«Cun terapia d'art vulain nus sustegnair dunnas»
ord Actualitad dals 01.12.2022. Maletg: RTR
laschar ir. Durada: 4 minutas 51 Secundas.

Quatter dunnas han prendì part

A l'occurrenza en il rom dals «Orange days» n'han ins betg stuì s'annunziar. Uschia na savevan ellas enfin la fin betg, quantas persunas che vegnian. La finala èsi stà ina gruppa da quatter dunnas. L'idea é stada da midar gritta u las emoziuns negativas en emoziuns creativas. Saja quai tristezza, dolur ni era sentiments en connex cun violenza envers dunnas – tut quels sentiments han gì plaz tar las duas terapeutas d'art.

Transfurmar l'energia negativa en energia creativa

Concret ha quai vid ora uschia: Mintgina da las dunnas ha prendì in toc arschiglia, furmà ina culla e tratg quella vid in cedel ch'era pendì vid la paraid. Quai han ellas fatg cun plirs tocs e cun mintga culla d'arschiglia é l'energia vegnida pli e pli gronda. Suenter han ellas furmà ord gest quell'arschiglia in animal. Tar ina hai dà in elefant, tar l'autra in utschè e tar tschella in tschut.

Arschiglia è ideal perquai ch'i é terra. Ins ha il sentiment ch'ins saja collià cun ils pes sin terra. I prenda davent ils patratgs dal chau e maina la concentraziun tals mauns.
Autur: Karin Rüegsegger terapeuta d'art


Vinavant vai en tschella stanza, en l'atelier da Sara Adzayi-Nussio nua ch'i è gia pinà massa differentas buttiglias da colur e penels da differentas grondezzas. Per mintga dunna penda in cedel alv vid la paraid. Mintgina da las dunnas sa decida lura gust ed intuiziun per las colurs che plaschan.

Differents maletgs - differents patratgs

Uschia datti la finala datti quatter fitg differents maletgs che mussan per part insatge concret, per part insatge abstract. Mintgina raquinta ina a l'autra ils patratgs ch'ella ha gì durant malegiar e tge ch'il maletg savess la finala mussar.


La terapia d'art – saja quai cun arschiglia u cun malegiar – po esser in agid per persunas che vulan visualisar lur sentiments. Per exempel tristezza e dolur. E quels dis qua cunzunt era per dunnas pertutgadas da violenza.

L'occurrenza ha anc lieu ina giada ils 6 da december a las 19.00 en la Steinbruchstrasse 16 a Cuira.

RTR actualitad 17:00

Artitgels legids il pli savens

Scrollar a sanestra Scrollar a dretga