Dapi la stad 2023 è il moviment da la spunda sur Brinzauls s'accelerà. Dapi il november 2024 è la situaziun s'accentuada cun il moviment da la «Gonda sura» ed il «Plateau ost». Perquai e pervia da la situaziun engrevgianta per la populaziun ch'è evacuada dapi prest in onn dumonda la regenza il parlament per in credit d'impegn da 50 milliuns francs per sustegnair abitantas ed abitants che vulan dischlocar preventivamain (qua tar la missiva).
Tras il moviment e las bovas hai era dà donns pli e pli gronds vid edifizis ed infrastructura. Sco quai che la regenza communitgescha n'èsi era betg exclus che singuls u plirs edifizis restan inabitabels. Però era perquai ch'ils custs da mantegniment da l'infrastructura creschan.
L'evacuaziun temporara da Brinzauls la primavaira 2023 e l'evacuaziun che dura bainbaud 1 onn (dapi il november 2024) sajan ina gronda sfida per tuts. Però surtut per la populaziun pertutgada da Brinzauls saja la situaziun fitg engrevgianta.
Perquai po la populaziun che vul dischlocar preventivamain s'annunziar per ina dischlocaziun preventiva lianta fin la fin da quest settember. Sin basa da l'interess fin ussa quinta la regenza cun custs totals da radund 55,6 milliuns francs – 35% da quels daners vegnessan da la Confederaziun. La regenza quinta da pudair cuvrir uschia radund 90% dals custs totals.
Planisà èsi ch'il Cussegl grond tractia quest credit d'impegn en sia sessiun da quest december.