L'emna passada ha la famiglia Bonifazi transportà sias vatgas sin ina pastgira sur Savognin. Normalmain é quai in di da legria, quest onn dentant betg, raquinta Giorgin Bonifazi. «Il mender è che nus na savain betg tge che capita l'atun. Nus na savain betg sche nus na pudain turnar a Brinzauls», uschia Bonifazi.
Era la famiglia Roth enconuscha il sentiment d'intschertezza. Er els san tge ch'i vul dir da viver mais a la lunga en l'exil. Gia tschintg giadas han els fatg midada dapi l'emprima evacuaziun. Dapi curt temp viva la famiglia Roth en in provisori a Churwalden. Ma cun pachetar ora èsi prest finì. Els èn ils emprims che han suttascrit la dumonda per ina translocaziun a moda preventiva. Els van voluntarmain.
«Igl è stà ina greva decisiun. Nus avevan abitaziuns affittadas, cun las qualas nus avevan finanzià noss provediment da la vegliadetgna. Quai è ussa tut rut davent. Per nus ina situaziun betg supportabla», uschia Werner Roth davart la decisiun da bandunar Brinzauls per adina. En lur chasa d'abitar a Brinzauls affittava il pèr Roth pli baud trais abitaziuns. Ussa mancan las entradas che segiravan ad els il provediment da la vegliadetgna.
Igl è stà ina greva decisiun. Nus avevan abitaziuns affittadas, cun las qualas nus avevan finanzià noss provediment da la vegliadetgna.
Ils Roths han decidì da cumprar in'abitaziun ad Aschera (Schiers) en il Partenz cun ils daners ch'els survegnan per la midada preventiva. Quella saja pli pitschna e pli bunmartgada che la chasa veglia a Brinzauls. Uschia possian els viver en la vegliadetgna.
Tuttina ha la translocaziun ses pretsch: «Finanzialmain ha quai consequenzas, quai è cler. Qua vali dentant era da far tschertas reducziuns. E suenter datti ina nova entschatta», uschia Werner Roth envers RTR.
Stgarpar giu las chasas?
La midada facultativa ha dentant anc in auter pretsch bler pli aut. La chasa d'abitar a Brinzauls sto vegnida disfatga. Quai è la cundiziun, per che la Confederaziun ed il chantun surpiglian 90 pertschient da la valur per in object d'abitar equivalent, quai sin basa da la lescha federala davart il guaud.
Lura è la vischnanca morta, lura è ella propi morta.
Quella regla fa per il mument ils pli gronds quitads al pur Georgin Bonifazi. El possia encleger tut quels che van per adina. E tuttina: «Jau na poss betg m'imaginar che las chasas da quels che van per adina ston vegnir stgarpadas giu. Lura è la vischnanca morta, lura è ella propi morta», uschia Bonifazi envers RTR.
Cura, co ed en tge furma che las chasas da quels che van per adina vegnan stgarpadas giu, n'è anc betg cler. I dovria anc in pau temp ed ulteriurs scleriments, era cun Berna, di il chantun sin dumonda da RTR.
Tant è dentant gia ussa cler: l'avegnir da la vischnanca è intschert, pli intschert che mai.