En il Grischun eran damain persunas senza lavur il matg. Cumpareglià cun l'avrigl è il dumber ì enavos per 146 persunas sin anc 1'192. La quota da dischoccupaziun è il mument uschia tar 1,1%, sco l'uffizi per industria e mastergn communitgescha.
Da las persunas dischoccupadas èn 561 dunnas e 630 umens. Il pli aut dumber da dischoccupads ha registrà la hotellaria (457), il commerzi en detagl (88), traffic e transport (88), ils fatgs da sanadad e socials (76) e l'industria da construcziun (71).
Guardà sur l'entira Svizra è il dumber da las persunas senza lavur medemamain ì enavos levet il matg. La quota da dischoccupaziun resta però tar 2,3%, sco il Secretariat statal per economia scriva.
Set manaschis cun lavur reducida
Il matg han set manaschis survegnì indemnisaziuns per lavur reducida en il Grischun. Maximalmain pudessan esser pertutgads 363 emploiadas ed emploiads. Cumpareglià cun il mais avant – cun 5 manaschis e 480 collavuraturas e collavuraturs ch'èn eventualmain pertutgads – è il dumber dals manaschis bain creschì levamain, percunter è il dumber da las persunas pertutgadas sa reducì. Dentant cunquai che las interpresas han trais mais peda da pretender las indemnisaziuns pudessan questas cifras variar.
