En il Grischun hai dà l'avrigl in zic dapli persunas senza lavur ch'anc il mars – en tut radund 1'340 persunas. La quota da dischoccupaziun saja uschia s'augmentada sin 1,2%, scriva l'Uffizi per industria, mastergn e lavur. Quai haja cunzunt da far cun il fatg che la stagiun d'enviern saja a fin.
Probabel er craschida dapi il mars saja la cifra da persunas che pudessan esser pertutgadas da lavur a temp reducì – da maximal 406 sin maximal 480. Exact sa laschan questas cifras dentant betg eruir, perquai che las persunas pertutgadas han temp trais mais da pretender in'indemnisaziun. Il dumber da persunas ch'èn gia dischoccupadas da lunga durada è restà stabil dapi il mars – circa 40 persunas.
Naziunal è la disoccupaziun sa reducida levamain
En tut la Svizra èn in zic pli paucas persunas stadas senza lavur l'avrigl. Cumpareglià cun il mars saja la quota da dischoccupaziun sa reducida da 2,4 sin 2,3%. Quai scriva il secretariat statal per economia Seco. En tut 70'613 persunas eran l'avrigl a la tschertga da lavur.