Dismessa illegala a Cuira - «Mai han ins gia attatgà cun in cuntè»

Là nua che la populaziun è pli gronda ed ins n'enconuscha betg mintgin, sco per exempel a Cuira, exista il problem da dismessa illegala. Lavureras e lavurers communals fan mintga di controllas sche rument vegn dismess illegalmain.

I saja definì cleramain nua ch’ins dastgia metter ora tge. Ina tura datti per palpiri vegl, in’autra per chartun. Mintgamai la damaun a las 07:00 il di da la tura èsi lubì da metter sper ils molocs il palpiri vegl u chartun.

Toleranza dettia natiralmain bain. Savens vegnia dentant dismess la rauba x-in di, e betg mo chartun e palpiri, mabain tut quai ch’ins po s’imaginar. Durant las turas da controlla traplan els era in u l’autra. Intgins cas dal passà mussian, ch’i saja per part meglier da mo far quellas turas cun ina firma da segirtad u cun la polizia.

Tar tals cas dovrian ins sustegn. Igl haja era gia dà vandalissem cun rument. Là hajan ils pumpiers stuì stizzar il fieu. Per ch'i na dettia betg dapli cas, dovrian ins la polizia. Lezza fetschia era controllas las fins d'emnas ed els s'annunzian sch'i va per rument. Uschia pon Renè Caviezel e ses team rimnar il rument e tener schuber la citad.

Dapli persunal?

Per far las controllas dovri persunal. In lavurer u ina lavurera avess da controllar tut ils 500 molocs ch'èn repartids sin l'entir territori da Cuira en in di e quai na saja simplamain betg pussaivel. Sch'ins veglia esser pli consequent, duvrassi ina plazza supplementara. Di Gregorio di ch'el fetschia cun ses auto tranter 100 e 130 kilometers il di.

Avant 10 onns, cura che l'infrastructura da dismetter rument n'era anc betg uschè buna sco ussa, era la problematica anc bler pli gronda, sco René Caviezel di. En intgins lieus haja dà mantuns cun satgs emplenids cun buttiglias, satgs da rument, chartun, mobiglias ed autra rauba, uschia ch'ins strusch veseva pli ils molocs. Quai saja sa midà, grazia a l'infrastructura e betg perquai ch'igl haja pli pauc rument che pli baud.

Sch'ins guarda las cifras lura ves'ins era in augment. Oz èsi en tut circa 1'200 tonnas chartun per onn ed avant corona eran quai anc circa 900 tonnas. «Onlineshopping» è en il trend. Perquai datti era dapli rument.

Era sch'i dettia dapli rument, saja la citad da Cuira ina citad schubra, sco il responsabel per ils ruments a Cuira, René Caviezel di. E tuttina dettia quai hotspots, lieus nua che la glieud dismettia illegalmain ses rument, e quai mintga di.