Trais onns suenter la crudada da crappa a Bondo, ha la cumissiun da donaziuns tractà la gronda part da las bun 50 dumondas d’agid. Ella haja pajà or 2,6 milliuns francs a persunas privatas e KMUs ch’han pers lur chasas, fatschentas u gì auters donns entras la catastrofa. Quai ha ditg Alberto Crameri, il president da la cumissiun da donaziuns envers il Schurnal regiunal da SRF.
10 milliuns van a la vischnanca per la reconstrucziun
En tut eran vegnidas ensemen donaziuns da passa 14 milliuns francs. Il surpli da donaziuns, circa 10 milliuns francs, giaja a la vischnanca per finanziar projects da reconstrucziun. La reconstrucziun da Bondo e conturn è chara. En ils emprims quatter onns suenter la bova quent'ins cun custs da 45 milliuns francs. La gronda part da quels custs surprendan Confederaziun e chantun.
