Cun la revisiun introducescha il chantun in management da smanatschas chantunal. Cun quest nov instrument duai vegnir impedì delicts grevs da violenza. En mira èn cunzunt delicts da violenza a chasa, violenza cunter autoritads, extremissem e radicalissem violent ed autras furmas da greva violenza. L'experientscha dad auters chantuns mussia ch'i sa tractia surtut da violenza a chasa.
Valitaziun permanenta dal risico
Il coc da questa nova partiziun da la polizia chantunala è dad identifitgar signals d'avertiment che sajan tipics avant che la situaziun escaleschia al delict. Il sistem duai promover e garantir che tals signals vegnian annunziads a la polizia. Questa partiziun examinescha l'annunzia e valitescha il risico dal cas concret. Saja quai l'annunzia ch'in um smanatscha vers sia consorta, saja quai in medi ch'annunzia blessuras suspectusas ubain er organisaziun u privats ch'annunzian. Las examinaziuns e valitaziuns duessan succeder en collavuraziun cun autras autoritads, persunas dal fatg, organisaziuns privatas (per exempel per la protecziun da victimas) però era cun persunas privatas en il context.
Cumpetenzas da barattar dapli datas e scumonds da contact u lieu
Per quest intent prevesa la revisiun era che la polizia dastga barattar infurmaziuns cun las organisaziuns participadas. Tenor il messadi però mo infurmaziuns ch'èn relevantas per il cas concret, sco per exempel sch'igl ha gia ina giada dà in'acziun sumeglianta en la vita dal delinquent potenzial. Fin ussa po la polizia barattar sulet las persunalias elementaras (num, prenum, lieu e telefon).
Cun discutar las datas ins po identifitgar sch'i dat in muster tar questa persuna e sch’ins sto guardar pli precis. Ni ch’ins vegn a la conclusiun che questa persuna è en ina situaziun difficila da vita ed i dat nagin privel.
Da l'autra vart pon uffiziers da polizia da nov era decretar in scumond da localitad, d'approximaziun u da contact insumma. Quai sin basa da la valitaziun permanenta dal risico e sin basa da smanatschas che resultan or da quai – sco per exempel smanatschas da delicts cunter il corp, la vita, l'integritad sexuala u la libertad. Ina nova cumpetenza ch'includa era la basa legala cunter il stalking.
È quai giustifitgà da ramassar datas?
Cun actualisar la lescha vegnan ramassadas e barattadas datas da persunas cun potenzial da violenza. Il responsabel per la protecziun da datas dal chantun Grischun ha ditg sin dumonda da SRF, ch’ils novs puncts en la lescha na sajan betg problematics. La professura da dretg penal da l’Universitad da Son Gagl, Monika Simmler fa attent, ch’ins stoppia guardar precis sin questas glistas che la polizia fetschia da las persunas ch'èn dadas en egl. La raschun: Ins na sappia betg dal tut co la polizia fetschia ina tala glista e surtut era co che quella vegnia puspè stizzada. Monika Simmler suttastritga ch’ils chantuns dovran ina clera basa legala. Tar questa metoda è era il privel che persunas vegnan en mira da la polizia che han fatg nagut. Da stgaffir ina basa legala è il plan dal chantun Grischun.