Siglir tar il cuntegn

Parcadis publics a Cuira Tura da controlla cun la polizia

Situaziun da parcadis a Cuira

Ils plirs che vivan u lavuran en la chapitala grischuna parcheschan lur auto mintgamai sin parcadis privats, sajan quai parcadis en il liber u plazzas en garaschas sutterranas che tutgan savens a fatschentas d'immobiglias. Ina cifra da parcadis privats da Cuira n'exista betg.

Parcadis publics che tutgan a la citad datti enturn 2'500, quels sa chattan derasads sin la surfatscha da la citad ed en la garascha sutterrana da l'Arcas. Ils parcadis publics vegnan tenor il cusseglier da la citad Simon Gredig surtut duvrads da visitadras e visitaders che vulan far cumpras u in gir a Cuira.

Il dumber da quels parcadis è ils ultims tschintg onns restà pli u main medem, cuntrari per exempel a Turitg u Basilea. Quellas citads han en il decurs dals davos 10 onns reducì enfin 3'000 parcadis en favur da zonas d'inscunter e vias da velo.

Retschertga da la situaziun dals parcadis publics en Svizra

A Cuira na saja la finamira da stgaffir dapli spazi verd ils ultims onns betg stada sisum da la glista politica. Cunquai che las votantas ed ils votants da Cuira han dentant acceptà la cuntraproposta da l'iniziativa da clima il mars da l'onn passà – che pretenda da transfurmar zonas da traffic en zonas d'inscunter, vias da velo e zonas per peduns – saja la regenza mumentan vi da planisar ed evaluar talas restructuraziuns. Tge plazzas che vegnan ad esser pertutgadas n'è anc betg cler – e cun quai era betg quants parcadis publics che vegnan a svanir.

La dumonda dals parcadis vegn reglada oravant tut tras la purschida.
Autur: Simon Gredig cusseglier da la citad, manader departament construcziun

Ina liquidaziun d'inquals parcadis na vegnia tenor Simon Gredig dentant betg a crear ina mancanza. Pli baud hajan ins per exempel anc pudì ir cun l'auto tras la citad veglia e parcar l'auto amez en. Oz saja la glieud tenor Simon Gredig s'endisada da parcar in zic ordvart e d'ir simplamain a pe u cun il velo en il center, uschia che quels parcadis ch'eran amez en na manchian betg.

Pussibilitads da reconstruir zonas vesa Simon Gredig en plirs lieus, uschia sco exempel l'Ottoplatz che sa chatta sur la staziun. Là datti var 70 parcadis publics sin la surfatscha e vitiers var trais garaschas sutterranas en curta distanza. Tenor il responsabel per il departament da construcziun Simon Gredig pudessan ins abolir quels parcadis publics a favur d'ina plazza pli attractiva e viva. E la glieud pudess grazia a las garaschas sutterranas anc adina parcar en vischinanza.

Decis concret na saja mumentan anc nagut, e la citad è anc vi d'elavurar e planisar tge plazzas che pudessan vegnir restructuradas.

Controllar parcadis cun la polizia da la citad

Per la controlla da parcadis èn mintgamai uschenumnads policists d'assistenza responsabels – auter che policists uffizials han quels ina scolaziun pli curta, na portan betg armas cun sasez ed èn il pli savens da viadi a pe. Uschia raquinta il policist d'assistenza Helder Marques ch'el fetschia per mais bundant 180 kilometers a pe, pia ina distanza sco da Cuira fin a Basilea.

Ein Mann in oranger Warnweste kontrolliert eine Parkuhr.
Legenda: Cun in rir sa regorda Helder Marques: «A l'entschatta hai jau pensà: tge èsi lura cun mias chommas? Entant sun jau ma disà.» RTR

Cunquai che policists e policistas d'assistenza èn il pli savens en gir a pe – daventan els ed ellas era savens persunas da contact per la glieud sin via.

Il pli gugent hai jau il contact cun umans.
Autur: Helder Marques policist d'assistenza

Sper controllar ils var 2'500 parcadis da la citad han ils total set policists d'assistenza da Cuira anc autras incumbensas. Quai èn tranter auter la regulaziun dal traffic e mantegnair ils vehichels da la polizia, vitiers sustegnan els la polizia en cas da discletgs u eveniments pli gronds.

In einer orangen Sicherheitsweste lächelt eine junge Polizistin mit einem Handy in der Hand.
Legenda: La policista Melanie Wildhaber, che fa oz excepziunalmain part a la controlla dals parcadis, declera che la polizia saja gist en cas d’eveniments extraordinaris leda da l'agid dals policists d'assistenza. RTR

Controllar parcadis saja ozendi ina chaussa detg simpla, sco Helder Marques declera. Uschia hajan els ina applicaziun speziala sin lur telefonin, e cun quella possian els mintgamai scannar il numer d'auto e vesian immediat sch'il possessur haja pajà u betg. L'ultim onn haja dà 13'471 cedels da multa e cun quai bundant in mez milliun francs d'entrada per la citad da Cuira. Questas cifras sajan ils ultims tschintg onns restadas pli u main medemas. In tschert dumber da chastis n'hajan els betg da cumplenir, pli gugent vesian els sche tut ils parcadis èn vegnids pajads a moda correcta.

Jau na m'allegrass era betg d'ina multa, perquai na chastiesch jau era betg gugent autra glieud.
Autur: Helder Marques policist d'assistenza

Betg darar capitia era ch'il possessur da l'auto arrivia gist en quest mument cura ch'in policist d'assistenza scriva ina multa. Lura saja quai impurtant da discurrer e declerar la situaziun per evitar conflicts. Dentant hajan ils pli blers pertutgads chapientscha, uschia ch'els hajan quasi mai gì situaziuns privlusas cun controllar parcadis.

RTR actualitad 08:00

Artitgels legids il pli savens