Cun la revisiun vul il chantun introducir in management da smanatschas chantunal. Cun quest nov instrument vul il chantun impedir delicts da violenza greva. En mira èn tenor la communicaziun dal chantun cunzunt delicts da violenza a chasa, violenza cunter autoritads, extremissem e radicalissem violent ed autras furmas da greva violenza. L'experientscha dad auters chantuns mussia ch'i sa tractia surtut da violenza a chasa.
Valitaziun permanenta dal risico
Il coc da questa nova partiziun da la polizia chantunala è dad identifitgar signals d'avertiment che sajan tipics avant che la situaziun escaleschia al delict. Il sistem duai promover e garantir che tals signals vegnian annunziads a la polizia. Questa partiziun examinescha l'annunzia e valitescha il risico dal cas concret.
Saja quai l'annunzia ch'in um smanatscha vers sia consorta – saja quai in medi ch'annunzia blessuras suspectusas – ubain era organisaziun u privats ch'annunzian. Quai duai succeder en collavuraziun cun autras autoritads, persunas dal fatg, organisaziuns privatas (per exempel per la protecziun da victimas) però era persunas privatas en il context.
Cumpetenzas da barattar dapli datas e scumonds da contact u lieu
Per quest intent prevesa la revisiun era che la polizia dastga barattar infurmaziuns cun las organisaziuns participadas. Tenor il messadi però mo infurmaziuns ch'èn relevantas per il cas concret, sco per exempel sch'igl ha gia ina giada dà in'acziun sumeglianta en la vita dal delinquent potenzial. Fin ussa po la polizia barattar sulet las persunalias elementaras (num, prenum, lieu e telefon).
Cun discutar las datas ins po identifitgar sche i dat in muster tar questa persuna e sch’ins sto guardar pli precis. Ni ch’ins vegn tar la conclusiun che questa persuna è en ina situaziun difficila da vita ed i dat nagin privel.
Da l'autra vart pon uffiziers da polizia da nov era decretar in scumond da localitad, d'approximaziun u da contact insumma. Quai sin basa da la valitaziun permanenta dal risico e sin basa da smanatschas che resultan or da quai – sco per exempel smanatschas da delicts cunter il corp, la vita, l'integritad sexuala u la libertad. Ina nova cumpetenza ch'includa era la basa legala cunter il stalking.
È quai giustifitgà da ramassar datas?
Sche la lescha da polizia vegn actualisada vegnissan ramassadas e barattadas datas da persunas cun potenzial da violenza. Il responsabel per la protecziun da datas dal chantun Grischun ha sin dumonda da SRF ditg, ch’ils novs puncts èn la lescha na sajan betg problematics. La professura da dretg penal da l’universitad San Galla, Monika Simmler fa attent, ch’ins sto guardar precis sin questas glistas che la polizia fa da las persunas ch’è han dat en egl. Perquai ch’ins sa betg dal tut sco ch’ins riva sin uschia ina glista e surtut era sco ch’ins vegn puspe stizzà d’ina tala glista. Ella suttastritga ch’ils chantuns dovran ina clara basa legala. Tar questa metoda è era il privel che persunas vegnan en mira da la polizia che han fatg nagut. Da stgaffir ina basa legala è il plan dal chantun Grischun.