Siglir tar il cuntegn

Header

cuntegn

Dronas cun cameras termicas Salvà passa 550 ansiels-chavriel

Tranter la fin da matg e l'entschatta fanadur han pilots e pilotas da dronas salvà 552 chavrielins da la mort tras la maschina da segar. Quai èn 85 dapli che l'onn passà.

190 pilots e pilotas èn idas var 1'720 giadas la damaun baud e la saira tard a tschertgar ansiels cun cameras termicas montadas vi da las dronas. Quai sajan 400 engaschaments dapli che l'onn passà. Regula Bollier, collavuratura scientifica da l'Uffizi per chatscha, sa mussa cuntent cun quels resultats.

Quai è ina prestaziuns grondiusa ch'è vegnida prestada.
Autur: Regula Bollier ollavuratura scientifica da l'Uffizi per chatscha

Mintga di ch'igl è vegnì segà èn sguladas almain 24 dronas tras l’aria en l'entir Grischun. Ina gronda part dals pilots sajan chatschaders u chatschadras. Senza la collavuraziun dad ellas e l’agricultura na fiss il project betg pussaivel.

Recrutar vinavant nova glieud

Ins haja dentant er cumbattì cun difficultads. Pliras giadas sajan dronas crudadas pervia da sbagls tecnics u sbagls da pilot. In'autra sfida saja, che blers purs hajan segà il medem mument. Lura saja difficil dad esser preschent en tut ils lieus.

La finamira per l'onn proxim saja cuntinuar cun ils buns resultats. Perquai èsi previs da recrutar novas pilotas ed auters gidanters sco er d'organisar dapli curs da perfecziunament proxima primavaira. Sco che Regula Bollier ha ditg sin dumonda dad RTR, fissi er bun da pudair cumprar anc intginas dronas per sustegnair intginas secziuns, per exempel en Engiadin'Ota u en la Surselva. Quai saja dentant ina dumonda dal budget.

Ord l'archiv

video
Dronas per chattar chavrielins avant ch'il pur sega
Or da Telesguard dals 22.06.2018.
laschar ir. Durada: 3 minutas 31 Secundas.

RTR novitads 10:00

Artitgels legids il pli savens