Il temp da corona ha protegì ils animals selvadis sin las vias grischunas. Tranter mez mars e mez matg hajan els registrà damain accidents cun animals. Quai ha ditg Hannes Jenny da l'Uffizi da chatscha e pestga a la chasa da medias «Südostschweiz».
Ed els hajan era dumbrà in quart damain animals crappads sin via cumpareglià cun las cifras dals davos 20 onns, ha Jenny aschuntà. Quai aja dentant er anc autras raschuns, sco il dumber d'animals e quant naiv ch'era anc en ils guauds.