La situaziun economica en il Grischun è buna enfin fitg buna. La pli gronda sfida resta la mancanza da persunal qualifitgà. Quai mussan ils resultats d'ina retschertga che l'organisaziun tetgala da l'economia grischuna ha fatg. A quella han bunamain 330 interpresas prendì part.
Mancanza da persunal ha consequenzas
I manca persunal qualifitgà per il mastergn ma er persunal spezialisà, quai mussan las respostas dals affars. Per il mument vegnian ins anc a frida cun las bleras consequenzas.
A la substanza va plitost sche las fatschentas stoppian spustar investiziuns e che la qualitad dals products u da la prestaziun sa sbassia. Da quai sajan entant radund in tschintgavel dals affars pertutgads.
Fatschentas prendan mesiras
Pervi da la situaziun prendan ils manaschis mesiras, mussa la retschertga. Dapli che la mesadad dals affars ha reagì cun pli autas pajas sco er cun offrir cundiziuns da lavur pli attractivas.
