Malgrà ch'ins fetschia gia bler en il chantun Grischun per l’integraziun da persunas cun in impediment, na saja nossa societad anc betg tar la destinaziun da quest viadi. Las fermezzas sa mussian tenor il cusseglier guvernativ responsabel, Marcus Caduff, per exempel tar las differentas pussaivladads d'abitar, tar l'integraziun da persunas cun in impediment en l'emprim martgà da lavur, ubain tar l'infrastructura. Potenzial datti dentant vinavant.
Perquai vegn stgaffida sin l'entschatta da l'onn 2025 in nov post che duess procurar che persunas cun in impediment survegnan ina vusch pli ferma. L'incumbensa da quest post vegn tranter auter ad esser da guardar ch'ils basegns da persunas cun in impediment saja resguardads sch'i dat novas leschas ni sche ordinaziuns e reglaments vegnan adattads.
Plinavant hajan ins constatà ch'i vegnia fatg bler, dentant betg coordinà bain. Er quai vegnia ad esser ina incumbensa dal nov post.
Metter ensemen ils tocs da puzzle
Quai beneventa er Philipp Ruckstuhl che maina la pli gronda organisaziun da commembers e commembras per persunas cun in impediment en il chantun, la Pro Cap Grischun. El aveva da lezzas uras, il 2020, cun-suttascrit sco deputà l'incumbensa a la Regenza d'analisar la situaziun.
Jau hai cumpareglià la gronda purschida per persunas cun in impediment cun in puzzle. Ils singuls tocs èn uss deturn, uss vai persuenter da metter ensemen els tar in entir. E perquai èsi segir la dretga via da stgaffir ina tala plazza.
In tema che stat en il center saja er la sensibilisaziun. La finala stoppia l'entira societad vegnir sensibilisada, ma il post ha en emprima lingia l'incumbensa da sensibilisar las collavuraturas ed ils collavuraturs dal Chantun.
Per il project da pilot che duess durar dal 2025 enfin il 2028, quinta il chantun Grischun cun custs da 1,2 milliuns francs. Sco proxim vegn scritta or la plazza da 80%, cun la finamira che la persuna che vegn tschernida sappia cumenzar sia incumbensa sin l'entschatta 2025.
