Persunas cun impediments dovran vinavant agid en bleras staziuns da viafier en il Grischun. Tenor la Viafier retica èn actualmain pir 49 da 103 staziuns bajegiadas ora uschia che persunas cun impediments pon duvrar ellas senz'agid – pia gnanc la mesadad. La lescha davart l’egualitad da persunas cun impediments è ida en vigur avant 20 onns. En sasez avess ella stuì avair realisà quai gia sin la fin da l’onn 2023.
Plazza da la staziun a Cuira proxim grond plazzal
Ils perruns dal tren Cuira-Arosa actuals sco er las staziuns da fermada dal bus sin la plazza da la staziun da Cuira na correspundan betg a las prescripziuns da la lescha davart l'egualitad da persunas cun impediments.
Per garantir l'accessibladad vegnan auzads tant ils perruns da la viafier sco er ils urs dal perrun per ils bus. Las lavurs da construcziun han gia cumenzà.
-
Bild 1 von 2. Bildquelle: RTR.
-
Bild 2 von 2. Bildquelle: Citad da Cuira.
Ils 23 da favrer 2026 cumenzan la Viafier retica e la citad da Cuira in project da midada cuminaivel che renovescha l'entira plazza da la staziun en sis etappas. En l'emprima fasa vegn il perrun ost dal tren d'Arosa auzà, quai en la part sin autezza da la Raiffeisen. Questas lavurs duran fin mez avrigl.
Pertge n'èn las staziuns anc betg prontas?
I dettia duas raschuns: D'ina vart dettia bleras staziuns en regiuns stippas u en stortas. Quai engrevgeschia las lavurs. Da l'autra vart sajan bleras staziuns en in nausch stadi ed hajan en general in basegn da renovaziun e modernisaziun. Vi da numerus edifizis artifizials e vi da la rait da viafier ston vegnir fatgas lavurs da mantegniment da la substanza.
-
Bild 1 von 4. Bildquelle: Viafier retica.
-
Bild 2 von 4. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
Qua sa resulta tenor la Viafier retica in dilemma: Per garantir in manaschi da viafier stabil na po il dumber da plazzals betg vegnir augmentà considerablamain. Il medem mument haja la segirezza per ils viagiaturs da tren emprima prioritad. I vala da chattar la balantscha tranter ils projects da mantegniment da la substanza, quels da la lescha davart l’egualitad da persunas cun impediments, sco era d’in manaschi da traffic funcziunond.
Stadi da la realisaziun tar la Viafier retica
Da las 103 staziuns da la Viafier retica èn fin oz 49 autonomas ed accessiblas per tuttas e tuts. Per 17 staziuns che n'han betg pudì vegnir renovadas confurm a la lescha sin l’emprim da schaner 2024 datti mesiras transitoricas. Quai munta ch’i dat agid da persunal, ina soluziun da manaschi u in servetsch da shuttle.
Quellas mesiras valian era per las 37 ulteriuras staziuns, nua che la renovaziun na saja betg ordinada or da raschuns da proporziunalitad. Tar quellas staziuns na vegnian las restructuraziuns betg sustegnidas finanzialmain da la Confederaziun.