Cun resguardar las frequenzas da passagiers sa mussa in zic in auter maletg. Uschia hajan gia 58% dals passagiers in access senza impediments als trens, conferma il responsabel da l’infrastructura da la Viafier retica Christian Florin.
Las prioritads èn per part sa midadas
La situaziun cun realisar las staziuns senza impediments è sa midada ils ultims onns. Il 2017 eran radund 40 staziuns bajegiadas enturn per persunas cun impediments. La finamira era da realisar sin il 2024 almain 50 staziuns. Ma cun il tact da mes’ura sajan las prioritads sa midadas e pliras staziuns stoppian vegnir adattadas, di Christian Florin. Tuttina sajan els en il plan – e possian ademplir las leschas cun alternativas sco in agid a l'access.
Sin il 2024 duai era Trun esser adattà
Las premissas nua adattar las staziuns sajan differentas. Uschia sajan las frequenzas segir il criteri principal. Ina rolla gioghia dentant per exempel era, sche instituziuns per persunas cun impediments sa chattan en la vischinanza d'ina staziun. Perquai vegn la staziun da Trun adattada tenor ils basegns per persunas cun impediments ils proxims onns. Quai duai sche pussaivel succeder anc avant il 2024, di Christian Florin.
Pro Infirmis vuless dapli discussiun
L’organisaziun Pro Infirmis Grischun s’engascha per pussibilitar l’access per persunas cun impediments al traffic public. Il manader Roman Brazerol attestescha ina buna lavur da la Viafier retica. Dentant na vegnian els betg savens integrads en la planisaziun u en la dumonda nua realisar ina ulteriura staziun. Qua pudessan els purtar bleras propostas, di Brazerol.
Ma el accentuescha era, che la lavur na saja betg fatga cun realisar ina staziun dal tren. Senza access senza barrieras en l’entira vischnanca na fetschia ina realisaziun betg senn. Uschia sajan per exempel era las vischnancas dumandadas – cun adattar fermadas d’auto da posta ni ils access ad infrastructura publica.
