Ils 14 da zercladur han en il Grischun lieu las elecziuns dal Cussegl grond. Sco il chantun ha communitgà, candideschan en tut 522 persunas – tantas sco anc mai.
Ils 7 d’avrigl è vegnida tratga la sort per la successiun da las glistas da las partidas. Quella successiun decida tge glista che stat il pli davant e tgenina il pli davos en il cudesch da vuschar che la populaziun grischuna survegn lura tramess a chasa.
Quai che dat en egl: avant quatter onns eran quai mo tschintg glistas, quest onn sis. Quai pervia da la partida verda. Quella ha numnadamain decidì ch’ella veglia ir suletta en il cumbat electoral.
Avant quatter onns era ella anc ensemen cun la Partida socialdemocratica. Uschia speran els da survegnir dapli vuschs e dapli sezs en il Cussegl grond.
Sch'ins cumpareglia il dumber da candidatas e candidats per il Cussegl grond croda si ch'i dat adina pli grond interess.
Bun quatter persunas cumbattan en media per in dals 120 sezs en il Cussegl grond.
Er tar la cumpart da dunnas è da constatar in augment. Bun in terz da tuttas candidaturas en dunnas: 176 dunnas (34%) e 346 (66%) umens vulan in sez en il parlament.
Gia il 2022 è questa cumpart creschida marcantamain suenter la critica il 2018 pertutgant mancanza da las dunnas.
Las trais candidatas las pli giuvnas èn da l'annada 2007, il candidat pli vegl da l'annada 1951. Vegliadetgna media da tuttas candidatas e da tut ils candidats munta a bun 41 onns.
Sper il Cussegl grond elegia il suveran mez zercladur er la regenza grischuna.
