L'Ems Chemie è vegnida undrada mardi saira a Sierre cun il «Premi naziunal da la furmaziun» per sia furmaziun professiunala. Cun quest premi undreschan las fundaziuns Hans Huber e FH Svizra interpresas che porschan ina furmaziun professiunala exemplarica e che promovan la furmaziun da basa duala.
Endrizzà lieu d'inscunter cun il premi
Sco che la Ems Chemie scriva, scoleschia ella actualmain 140 atgnas emprendistas ed emprendists ed anc 100 emprendistas ed emprendists da terzs manaschis en 15 professiuns. Cun ils 20'000 francs dal premi hajan las emprendistas ed ils emprendists endrizzà sin l'areal da Domat in lieu d'inscunter en il liber. Il manader da persunal da l'EMS Chemie Marco Zürcher vesa quest lieu sco ina pussaivladad da rinforzar il spiert da gruppa en l'interpresa.
