La Polizia chantunala dal Grischun cumenza il prim da mars 2026 in test da tschintg mais. Durant quest temp publitgescha ella nua ch'ella metta apparats per controllar la sveltezza. En ina communicaziun scriva la polizia che la finamira è da vesair sche quai fa ir pli plaun ils automobilists e las automobilistas. Sin la pagina d'internet da la Polizia chantunala duain vegnir publitgads en il futur il lieu e la via dals indrizs da mesiraziun.
Cumparegliaziun cun las mesiraziuns precedentas
Per survegnir datas expressivas vegnan duvrads en l'emprova da pilot per part ils medems lieus da mesiraziun sco l'onn passà. Uschia duain ils surpassaments da sveltezza vegnir cumparegliads directamain cun e senza inditgar publicamain il lieu.
Ins guarda separadamain ils autos dal Grischun, dal rest da la Svizra e da l'exteriur. Uschia pon ins differenziar tranter il traffic da vacanzas e quel local. La polizia di che l'aura, la temperatura e las vacanzas pon influenzar ils resultats. Tuttina, ella spera da survegnir infurmaziuns nizzaivlas da quest test.
Ina conclusiun interessanta pudessi dar tar ils clics sin la pagina d'internet. Dapli clics muntan dapli savida ed in effect pussaivel sin il cumportament sin las vias.
Dumonda davart la segirezza dal traffic
L'impuls per l'emprova da pilot è stada ina dumonda en il Cussegl grond durant la sessiun da favrer 2025. Schebain che la regenza na parta betg dal fatg che la publicaziun dals lieus da mesiraziun augmentia considerablamain la segirezza dal traffic, ha ella approvà quest project. Ins vul rimnar experientschas ed ultra da quai metter ils resultats en connex cun las enconuschientschas d'auters chantuns.
Jau sun avert dentant na suppon jau betg, ch'i dat in effect positiv. Schi'ns sa nua ch'i ha indrizs semistaziunars, san ins era nua ch'i n'ha betg tals indrizs.
Fertant ch'ina schelta da lieus dals indrizs semistaziunars vegn publitgada, duain apparats mobils vinavant esser preschents en l'entir chantun en lieus betg enconuschents per evitar delicts da sveltezza.
Suenter la fin da l'emprova da pilot duai in rapport final servir sco basa per ulteriuras decisiuns – per exempel davart la dumonda, sch'ins less cuntinuar cun publitgar las posiziuns, adattar u puspè smetter cun tut.