La cussegliera guvernativa Carmelia Maissen, scheffa dal Departament d'infrastructura, energia e mobilitad, preschenta la visiun dal chantun Grischun: «Fin l'onn 2037 è il traffic betg motorisà ina pitga principala centrala da la mobilitad en il chantun Grischun, uschia che la mesadad da tut ils viadis en il chantun vegn fatg a pe u cun il velo.»
Tenor la strategia duai la mobilitad activa en il mintgadi ed en il temp liber sa chapir da sezza e vegnir promovida en moda activa. Uschia la cussegliera guvernativa davart la nova strategia. Quai saja ina finamira ambiziusa ma realistica.
Nus essan da l'opiniun che quai è realistic. Igl è ina finamira ambiziusa, dentant sch'ins preschenta ina strategia, dovri era finamiras ambiziusas.
La «Strategia per il traffic betg motorisà en il Grischun 2037» è vegnida elavurada ils ultims dus onns d'ina gruppa da project che cumpiglia plirs departaments e posts da servetsch. Differentas organisaziuns spezialisadas han fatg valair lur interess sco per exempel Pro Velo ubain Swiss Cycling.
Per ch'il traffic betg motorisà daventia ils proxims 12 onns la pitga principala centrala dal Grischun, èn vegnidas definidas en la strategia las suandantas trais finamiras per l'entir territori chantunal:
- Finamira 1: Furmas da mobilitad equivalentas
Il traffic betg motorisà è en il chantun Grischun – ultra dal traffic individual motorisà e dal traffic public – ina furma da mobilitad equivalenta e cun ils medems dretgs. - Finamira 2: Augment da la cumpart dal traffic betg motorisà
La part dal traffic betg motorisà è s'augmentada cleramain en il chantun Grischun pervia d'ina promoziun sistematica. - Finamira 3: Cleras cumpetenzas e clers process
Las cumpetenzas ed ils process concernent il traffic betg motorisà èn reglads e coordinads cleramain en il chantun Grischun.
Per realisar cun success la «Strategia per il traffic betg motorisà en il Grischun 2037» èn vegnids fixads tschintg champs d'acziun tematics:
- Planisaziun da la rait: Il chantun surpiglia ina rolla activa e coordinativa en la planisaziun da raits e sustegna pli fitg las vischnancas.
- Augmentaziun da la dumonda en il traffic betg motorisà: Il chantun agescha en moda activa ed intenziunada per augmentar la dumonda dal traffic betg motorisà en il traffic quotidian e da temp liber.
- Planisaziun che cumpiglia plirs meds da traffic: Il chantun extenda la planisaziun che cumpiglia plirs meds da transport e rinforza la colliaziun da las differentas purschidas da mobilitad.
- Process ed organisaziun da l'administraziun chantunala: Il chantun simplifitgescha ils process e l'organisaziun da l'administraziun chantunala e fa avanzar en moda effizienta la promoziun dal traffic betg motorisà.
- Basas giuridicas: Il chantun franchescha en las basas giuridicas cundiziuns generalas adattadas e novas concernent il traffic betg motorisà.
Mintgin dals tschintg champs d'acziun cuntegna differentas incumbensas concretas al chantun. En intgins champs d'acziun vegnan ultra da quai fatgas recumandaziuns a las vischnancas ed a las regiuns. «La ‹Strategia per il traffic betg motorisà en il Grischun 2037› porscha la schanza da sviluppar vinavant noss chantun en moda progressiva.» di Carmelia Maissen. Ella vul nizzegiar la schanza da midar il med da transport.
Nizzegiain questa schanza – midain cuminaivlamain med da transport!
La realisaziun da la «Strategia per il traffic betg motorisà en il Grischun 2037» vegn ussa promovida pass per pass. Per quest intent nominescha il chantun in'organisaziun da project, per la quala l'Uffizi da construcziun bassa sco post spezialisà per il traffic betg motorisà surpiglia la responsabladad strategica.
In team da project sa deditgescha a l'elavuraziun da las mesiras concretas sco er a la coordinaziun specifica tranter ils uffizis. Ultra da quai nominescha il chantun ina gruppa accumpagnanta cun persunas spezialisadas, represchentantas e represchentants da regiuns e da vischnancas, stakeholders relevants dals uffizis chantunals pertutgads sco era federaziuns spezialisadas ed organisaziuns externas.
Questa gruppa vegn infurmada regularmain davart il stadi da realisaziun e tenor basegn integrada. Pir cura che las mesiras concretas èn definidas pon ils custs vegnir determinads, uschia Carmelia Maissen.