Ir svelt a far cumissiuns e laschar il velo senza mischlos avant porta. Quai po esser fatal sch'in lader prenda la chaschun ed engola il velo. Igl è perquai impurtant da resguardar inqual chaussa per ch'il velo, l'e-bike u il bike resta vinavant en ils mauns da la possessura u dal possessur ed evitar grittas. L'uniun Pro Velo cusseglia il suandant:
- Metter il velo sche pussaivel en in lieu serrà u observà (garascha, tschaler, staziun da velo).
- Avair in mischlos robust ubain cumbinar dus mischlos (in da cifras ed in da clav).
- Betg be serrar il velo cun in mischlos mabain rentar el cun il mischlos vid ina pitga, saiv etc.
- Nudar il numer dal rom dal velo, la marca e la colur.
- Velos pon vegnir registrads en in register privat (cun pajar ina taxa) uschia pon ins tschertgar el meglier en cas d'enguladitsch.
Segirada: Velos èn per regla segirads en la segirada da rauba da chasa (Hausrat). Velos pli chars sco bikes u bikes electronics n'èn savens dentant betg segirads en questa segirada, perquai dovri tut tenor ina supplementara.
Tge far en in cas d'enguladitsch?
- Denunziar a la polizia: Inditgar tut las infurmaziuns relevantas sco marca, lieu e spezialitads etc. Far ina copia da la denunzia per inoltrar quella a la segirada.
- Annunziar l'enguladitsch a la segirada
- Guardar sin plattafurmas online: Tschertgai sin plattafurmas online nua ch'i vegn vendì velos sche voss velo è là.
- Far a savair il conturn da l'enguladitsch: Infurmar il conturn en las raits socialas, la fatschenta da velo locala u er autras velocipedistas u velocipedists.
Enfin a 40'000 enguladitschs ad onn
Enguladitschs da velos tutgan in zic al mintga di. Tenor Pro Velo Svizra vegnian circa 40'000 enguladitschs annunziads mintga onn a la polizia. La cifra da enguladitschs effectivs saja dentant bler pli auta, almain il dubel dals cas annunziads. La schanza ch'il velo vegnia chattà u turnia tar ses possessur u sia possessura saja pitschna – Pro Velo discurra da 5%.
Er en il Grischun hai dà l'ultim temp annunzias d'enguladitschs da velo. L'emna passada èn scappads trais persunas a Malans ch'eran vid chargiar velos en in transporter. La Polizia chantunala dal Grischun tschertga per quest cas perditgas. Er en la citad da Cuira datti adina puspè enguladitschs da velo, cunzunt pertutgads en ils lieus enturn la staziun, la via da la staziun u er la via da la posta.