A la dieta dal traffic plaun han differentas persunas dal fatg ed experts tegnì referats. Sur da las differenzas tranter il traffic plaun dal mintgadi e temp liber, sur da las sfidas ch'il chantun Grischun ha per realisar novas vias u era sur da variantas ch'auters pajais han. Per exempel è vegnì preschentà il sistem da vias da velo ch'ins ha en ils Pajais Bass. Là datti in'entira rait da vias be per ils velos. Punts, giratoris e vias entiras e betg be strivlas da velo sco en Svizra. Tenor cussegliera guvernativa Carmelia Maissen n'è ina varianta sco en ils Pajais Bass betg pussaivla en il Grischun. La topografia grischuna saja memia cumplitgada per in tal sistem.
In sistem sco en ils Pajais Bass fiss in siemi ma betg pussaivel.
Sper il traffic da velo tutga era il traffic da peduns tar il traffic plaun. Betg mo peduns en vischnanca sin ils passapes mabain era sin las sendas durant viandar. Il hobby da viandar ha ils ultims onns gì in boom. Differentas persunas han era decis da far or dal hobby la professiun. Per exempel cun daventar influencer da viandar. In da quels è Robin Pickis.
Per la lavur sun jau per pli sulet en muntogna. Per far la differenza cun il temp liber emprov jau da viandar cun amis. Quai dat dapli recreaziun.
Turas en l'entira Svizra promova el cun curts videos sin instagram. A l'entschatta ha la carriera gì ina greva partenza pervia da tut la critica invers influencers. Ils agens dubis eran gronds ch'el na era betg segir sch'el duess far enavant. Oz ha el sin ses instagram account «instaswiss» passa 130'000 followers. La critica è anc adina in tema ch'occupa ma betg pli uschè ferm. Quai che fa uss dapli fadia è ch'ina tura in muntogna na è per el betg pli simplamain giudair mabain adina lavur. Perquai ha el stuì emprender da far la differenza tranter viandar per la lavur e viandar per il hobby.
