Siglir tar il cuntegn

Header

video
Chalur a distanza duai daventar pli efficienta
Or da Telesguard dals 31.01.2023.
laschar ir. Durada: 4 minutas 4 Secundas.
cuntegn

Energia or da rument Chalur a distanza a Cuira duai daventar pli effizienta

La citad da Cuira survegn dapli chalur a distanza da l'ardera Gevag a Trimmis. La IBC, che furnescha energia ed aua als abitants da Cuira, ha suttascrit in contract da cumpra per la furniziun dad ulteriura energia termica. Quella basta per var 2'500 chasadas. La rait da chalira a distanza da la Gevag e la IBC è ina da las diesch parts, uschenumnads clusters en la citad Cuira.

Carta da Cuira cun differentas parts, uschenumnads Clusters
Legenda: La citad da Cuira vegn partida si en diesch parts che duain enfin l’onn 2040 vegnir stgaudadas cun energia neutrala al CO2. La part turchisa da la vart dretga è la rait da chalira a distanza da la IBC e Gevag. RTR, Milena Bassin

L'aua chauda da var 100 grad che deriva da la Gevag stgauda gia oz edifizis a Cuira. Dentant ha era l'aua che returna en l'ardera anc in potenzial che na vegn betg nizzegià. Uss vul ins era nizzegiar l'energia da l'aua da return da var 60 grad. Pia vegn l’aua stgaudada tar la Gevag a Trimmis, transportada da la Fernwärme AG a Cuira e scumpartida da la IBC en las chasadas. Vitiers duain las chasadas uss era profitar da l’aua chauda che returna tar la Gevag.

Per la Gevag munta quai che nus pudain dar giu dapli energia neutrala al CO2 a la citad.
Autur: François Boone mainafatschenta Gevag

L'IBC ha elavurà in concept per nizzegiar anc meglier il potenzial da la chalur a distanza. Cun quai vul ins augmentar l'effizienza da l'ardera e far in ulteriur pass en direcziun d'ina citad neutrala al CO2 fin il 2040. Quest project custa en tut 300 milliuns francs. Per savair realisar quai sustegna la citad Cuira la IBC cun 80 milliuns francs. Sur quest credit sto la populaziun da Cuira votar ils 12 mars.

Sche la populaziun di Na, alura as tegnain nus ferm a noss princip da Cuira neutral al CO2, i va dentant pli ditg.
Autur: Stefan Illien mainafatschenta IBC
audio
Cuira: Chalur a distanza duai daventar pli efficienta
ord Actualitad dals 31.01.2023.
laschar ir. Durada: 2 minutas 54 Secundas.

Or da l'archiv:

RTR Telesguard 17:40

Artitgels legids il pli savens