Ina da las raschuns principalas ch'il di da gieus per uffants a Cuira n'ha betg lieu quest onn è ch'ils raps mancan – perquai ch'ils sponsurs principals èn sa retratgs. Quai di Sandro Simon Caviezel, il president dal comité d'organisaziun. In ulteriur motiv è ch'i saja ils ultims onns daventà pli e pli grev da chattar avunda voluntaris e voluntarias. Sco cuntramesira hajan ins collavurà cun differentas uniuns che sajan vegnidas a gidar per ina contribuziun en lur cassa. Tut las attracziuns sco per exempel il pitschen tren, il chastè trampolin e concerts eran gratuitas.
Sch'igl ha dà ina lunga colonna per exempel tar il pitschen tren haja per part dà grondas discussiuns cun geniturs, pertge che lur uffant na dastga betg ir duas giadas cun il tren.
Er ha Sandro Simon Caviezel ch'è gia passa 10 onns en il comité d'organisaziun constatà ils ultims onns che la lavur dals voluntaris na vegnia betg pli appreziada uschè fitg dals visitaders. Adina pli savens haja dà reclamaziuns e discussiuns.
Sch'i gieva per serrar il chastè trampolin ed ils uffants han stuì bandunar quel avain nus propi gì tridas scenas: Pertge ch'i na saja betg pussaivel da star pli ditg, i na saja gea anc betg uschè tard. Igl è simplamain adina daventà pli difficil.
In'explicaziun generala per quest svilup n'ha Sandro Simon Caviezel betg. Ma el pudess s'imaginar che la fiera saja forsa er simplamain in zic sursaziada, cunquai ch'i dettia entant varsaquantas purschidas sumegliantas.
Tschertga da voluntaris è in tema tar la festa d'uffants a Laax
Bain saja la tschertga da voluntaris in tema, acuta na saja la situaziun dentant betg, di Patrizia Hänggi dal comité d'organisaziun da la festa d'uffants a Laax. Ils ultims onns saja dentant schon stà pli grev da chattar avunda persunas che s'engaschian voluntarmain. Mintg’onn dovria in sforz per chattar avunda voluntaris. Els fetschian reclama en il radio ed en las medias socialas u sin il status da Whatsapp – e repartian fegls sgulants per chattar avunda gidanters e gidantras per la festa d'uffants a Laax. Er tgi ch'è gia stà voluntari vegnia dumandà per la proxima ediziun da la festa.
Observaziuns ch'il cumportament dals giasts vers voluntaris haja sa mida n'ha Patriza Hänggi fatg naginas. La lavur vegnia per la pli gronda part appreziada fermamain.
Per gronda part èn tuts ventiraivels. Ils voluntaris van a chasa stanchels ma ventiraivels.
Sfurzads da collavurar cun uniuns che vegnian a gidar per ina contribuziun en lur cassa na sajan els fin uss betg stads, di Patrizia Hänggi.
Impressiuns da la festa d'uffants a Laax
-
Bild 1 von 5. Bildquelle: RTR.
-
Bild 2 von 5. Bildquelle: RTR.
-
Bild 3 von 5. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: RTR.
Svilup da l'engaschi voluntari
Sch'i va per lavur voluntaria stoppian ins distinguer tranter lavur voluntaria formala – vul dir per exempel gidar ad occurrenzas sco ina festa d'uffants u in festival – ed in uffizi d'onur, pia surprender per exempel il presidi dad ina uniun u in uffizi politic, declera Dario Wellinger da la FHGR. El è sa fatschentà cun la tematica da la lavur voluntaria.
Anzi a l'impressiun mussan las cifras, che l'engaschi voluntari formal ha prendì tier levamain ils ultims 25 onns. L'engaschi per in uffizi d'onur haja dentant prendì giu marcantamain. Igl haja dentant er dà in svilup tar l'engaschi dals voluntaris «classics» di Dario Wellinger.
Ozendi tschertgia la glieud plitost in engaschament temporar – 40% dals engaschis voluntaris sa basian sin in project. Vul dir ch'in giaja ina giada a gidar e suenter as saja puspè davent. Quai fetschia pli difficila la recrutaziun da voluntaris e voluntarias, di Dario Wellinger.
Avant 30 onns s'engaschavan ins ord motivs da conscienziusitad, pia perquai ch'ins fascheva qua simplamain. Ozendi stat il senn ed il divertiment davanttiers. Ins sto pia er pledentar auter las persunas sch'ins vul gudagnar ellas per in engaschament voluntari.
Co ch'ins pledenta la glieud saja substanzial per la recrutaziun da gidanters. Ils voluntaris da tschep, quels che sajan mintg'onn vegnids a gidar in’occurrenza, crodian ozendi per gronda part davent. I na saja er betg pli la regla che las uniuns sa mettian simplamain a disposiziun sco voluntaris.
Sche la lavur voluntaria fetschia plaschair e haja in senn, lura as chattia schon glieud che s'engaschia, di Dario Wellinger. Ma ins stoppia agir a moda e maniera proactiva per recrutar voluntaris e voluntarias. I saja daventà pli pretensius e dovria dapli stentas ed impundiment per chattar e motivar persunas per la lavur voluntaria.