Suenter la desditga da las cursas l’onn 2024 è sa mussà l'aura d'ina meglra vart per la 19avla ediziun dal maraton da velos a Zernez. Durant trais dis èn s'inscuntrads ils fans dal velo sin via per sa mesirar en trais differentas cursas ch'han manà sur tschintg pass ed en tut sur bun 4'000 meters d'autezza.
Durant la cursa lunga sur il Pass dal Flüela e sur il Pass da l'Alvra hai dà in accident, uschia ch'ils organisaturs han stuì intervegnir. Sco Flurin Bezzola, il president da l'OK, ha ditg envers RTR, hajan ins interrut la cursa sin il Pass da l'Alvra e neutralisà la cursa enfin a La Punt. Ins haja era accumpagnà las grondas gruppas d'atlets ed atletas che sajan sa rimnadas sin il pass.
Per tut ils atlets e las atletas ch'èn arrivadas suenter l'accident sin il pass han ins prendì il temp da là sco temp final.
Pascal Schmid e Janine Meyer gudognan La Svizra
Il podest da la rangaziun generala dals umens sa preschenta sco suonda:
- Pascal Schmid – Svizra (3:20:41,9)
- Cédric Werder – Svizra (3:20:42,0)
- Pascal Wiederhold – Germania (3:25:56,3)
Tar las dunnas ha la medema gudagnà sco tar la Curta
- Janine Meyer – Germania (3:36:15,6)
- Lisa Stein – Germania (3:49:49,8)
- Petra Eggenschwiler – Svizra (3:25:29,2 // Temp sin il Pass d'Alvra)
Cédric Werder e Janine Meyer gudognan La Curta
Il podest da la rangaziun generala dals umens sa preschenta sco suonda:
- Cédric Werder – Svizra (2:23:37,7)
- Alessio Bragagna – Italia (2:23:37,7)
- Pascal Schmid – Svizra (2:23:37,7)
Tar las dunnas èn trais Tudestgas represchentadas sin il podest:
- Janine Meyer – Germania (2:28:58,6)
- Lisa Hartung – Germania (2:38:40,3)
- Lisa Stein – Germania (2:38:41,0)
Rangaziun cumpletta
Jonas Bärfuss – in passlunghist cun ambiziuns
Il giuven da 18 onns da Samedan è commember dal cader C da Swiss-Ski. Jonas Bärfuss sa participescha en emprima lingia a la cursa roiala causa ch’el ha grond plaschair dad ir cun velo. Ma el vesa questa cursa era sco trenament.
Per mai vai oravant tut per esser da cumpagnia ed avair plaschair, ma segir er per dar cumplainamain gas.
Jonas Bärfuss fa actualmain il giarsunadi da scrinari a Samedan. Durant la stad datti la pussaivladad d'ir cun skis cun rodas u a currer, ma era ir cun il velo stat sin il program da trenament.
Sco passlunghist ha l'Engiadinais la finamira da pudair sa participar als campiunadis mundials dals juniors a Trondheim en la Norvegia il 2026.
Flurin Bezzola – la cursa è ina sfida logistica
Organisar ina cursa sin vias chantunalas e communalas per radund 1'600 velocipedistas e velocipedists saja ina sfida, di il president dal comité d’organisaziun Flurin Bezzola.
Radund 40 voluntaris vegnan ad esser sin via per coordinar il traffic, plinavant avain nus ina stretga collavuraziun cun la Polizia chantunala.
Plinavant vegn er l’ambulanza ad esser da viadi per garantir in svelt servetsch en cas d’accidents. Giu dal Pass da l'Alvra era oriundamain previs da neutralisar la cursa, quai en consequenza da l'accident mortal dal velocipedist Gino Mäder avant dus onns. Ma quest concept n'ha betg funcziunà.
L’unica mesira è d'esser preschent cun persunal al lieu, e quel cumonda a las velocipedistas ed ils velocipedists da franar.
Totalmain radund 200 voluntarias e voluntaris vegnan ad esser durant quels dis en acziun per garantir a las participantas ed als participants ina cursa nunemblidaivla.