Suenter la desditga da las cursas l’onn 2024 mussan las prognosas da l'aura bunas previstas per la 19avla ediziun dal maraton da velos a Zernez. Durant trais dis s’inscuntran ils fans dal velo sin via per sa mesirar en trais differentas cursas.
Jonas Bärfuss – in passlunghist cun ambiziuns
Il giuven da 18 onns da Samedan è commember dal cader C da Swiss-Ski. Jonas Bärfuss sa participescha en emprima lingia a la cursa roiala causa ch’el ha grond plaschair dad ir cul velo. Ma el vesa questa cursa era sco trenament.
Per mai vai oravant tut per esser da cumpagnia ed avair plaschair, ma segir er per dar cumplainamain gas.
Jonas Bärfuss fa actualmain il giarsunadi da scrinari a Samedan. Durant la stad datti la pussaivladad d'ir cun skis cun rodas u a currer, ma era ir cun il velo stat sin il program da trenament.
Sco passlungist ha l'Engiadinais la finamira da pudair sa participar als campiunadis mundialas dals juniors a Trondheim en Norvegia il 2026.
Flurin Bezzola – la cursa è ina sfida logistica
Organisar ina cursa sin vias chantunalas e communalas per radund 1'600 velocipedistas e velocipedists saja ina sfida, di il president dal comite d’organisaziun Flurin Bezzola.
Radund 40 voluntaris vegnan ad esser sin via per coordinar il traffic, plinavant avain nus ina stretga collavuraziun cun la Polizia chantunala.
Plinavant vegn er l’ambulanza ad esser da viadi per garantir in svelt servetsch en cas d’accidents. Giu dal Pass da l'Alvra era oriundamain previs da neutralisar la cursa, quai en consequenza da l'accident mortal dal velocipedist Gino Mäder avant dus onns. Ma quest concept n'ha betg funcziunà.
L’unica mesira è d'esser preschent cun persunal al lieu che cumonda las velocipedistas ed ils velocipedists da franar.
Radund 200 voluntarias e voluntaris vegnan ad esser durant quels dis en acziun per garantir a las participantas ed ils participants ina cursa nunemblidaivla.