Puspè hai dà temperaturas da record en Svizra, er en ils auts. Uschia lieuan er ils glatschers. Or dal glatsch cumparan betg mo crappa ed aua, mabain er tut quai ch’umans han laschà enavos.
Sin il vadretg da Pers en la regiun dal Bernina èn voluntaris e voluntarias sa scuntrads per rumir las restanzas e las dismetter. Ma betg memia precipità. Al lieu è era l’archeolog Raphael Sele che giuditgescha ils chats.
Gist era las scuvertas recentas pon esser fitg infurmativas.
Gia daditg vegn la regiun frequentada per turas alpinas. Uschia sa rimna bler material. Rests dad ina staziun meteorologica, skis, in apparat da fotografar dal tschientaner passà u in zappunet èn be ina schelta dals chats da quest di. Gian Luck, guid da muntogna da Puntraschigna, pensa dentant che quai na saja betg mo perquai ch’ils alpinists ed alpinistas bittian simplamain davent il rument.
Al Piz Palü davos nus hai dà lavinas, là na chatt’ins maina tut. Ins è cuntent sch’ins po salvar ils umans.
Er in satgados plain, schizunt cun telefonin, han las 48 gidantras e gidanters chattà – quel vegn lura surdà a la polizia. La gronda part, 250 kilograms, vegn dentant sgulada cun helicopter a Puntraschigna en il lavuratori communal.
Or da l'archiv: acziuns da nettegiar l'ambient
