Tschintg mais praschun cundiziunà tar in temp d'emprova da dus onns per l'anteriur mainafatschenta da la «Vulpera Vermietungs- und Verwaltungs AG». Questa sentenzia ha il Tribunal regiunal Engiadina Bassa Val Müstair relaschà – sco la Posta Ladina rapporta.
La procura publica aveva pretendì 9 mais praschun. Tranter il 2013 e 2018 aveva il mainafatschenta meglierà la bilantscha cun cudeschaziuns fictivas da totalmain 148'000 francs ed uschia effectuà pajaments da bonus, da radund 80'000 francs, per ils collavuraturs. Perquai ch'el è sa cunvegnì durant la debatta giudiziala cun la firma da pajar enavos las bunificaziuns pajadas ad el, radund 56'000 francs, n'è la dretgira betg stada da l'avis ch'el haja vulì s'enritgir.
La decisiun n'ha anc betg vigur legala. L'advocat dal mainafatschenta ha confirmà envers la Posta Ladina ch'el vegnia a decider ensemen cun ses mandant sch'els tiran vinavant a la proxima instanza.
Nagina scolaziun da contabilitad
L'advocat da l'anteriur mainafatschenta ha argumentà che lez n'aveva naginas enconuschientschas professiunalas da contabilitad, e l'interpresa saja uschia sezza la culpa per donns finanzials, sch'i engaschan ina persuna betg qualifitgada.
La dretgira ha era renconuschì il fatg, ch'ils dretgs dal accusà na sajan betg vegnids resguardads avunda durant la procedura penala. I fiss stà necessari da metter a disposiziun in advocat da defensiun ad el. Pervi da quai sbagl da la procedura penala n'èn tscherts documents e protocols d'interrogaziun betg vegnids duvrads sco mussaments da cumprova. L'accusà ha survegnì ina bunificaziun inuffiziala da 4'000 francs. El sto pajar dus terz dals custs penals.
